محمەد سانری: کورد ئێدی وەکی نەتەوەیەک خودان دەولەت و دەستھەڵات دەردکەفتینە پێش دنیایێ

 

باکووری کوردستانێ-KDP.info-  نڤیسه‌ر و چاڤدێرەکی سیاسی ل باکووری کوردستانێ دبێژیت، پرۆسەیا ریفراندۆما سەرخوەبوونێ ئێدی ب هەموو شێوەیان دێ کاریگەریەکە مەزن ل سەر نێرین و تێگەھشتنا سیاسییا کوردان ژی کەت.

 

هه‌روسا گۆت، کورد ئێدی نە ب کارێن گروپان، رێکخستنێن ئایدۆلۆژی و بەرتەنگ  تەماشەی دنیایی کەن، بەلکو ب نێرینا ئاڤاکرن و خورتکرنا دەولەتێ دێ ل دنیا و سیاسەتێ تەماشەکەن، رێگەھا سیاسەتا کوردیا سەرەکی دێ ئەڤەبیت.

(محەمەد سانری)، بۆ ماڵپەرێ فەرمیی یێ پارتی دیموکراتی کوردستان گۆت:'' ئێدی ھەم د سیاسەتا ناڤخوەیی و ھەم ژی د یا نێڤدەولەتی دا دێ کورد ب سیاسەت، پرۆتۆکۆل و سەمبۆلێن دەولەتێ دەرکەڤنە پێش، گەلەک ئاشکەرایە کۆ دژمنێ کوردان ھێژ دخوازن کوردان ب رەنگەکێ نەراست  رابەری دنیایێ بکەن. بەلێ ئەڤ ھەوڵا دژمنێن کوردان سەرناگریت،  ژ بەرکو کورد ئێدی وەکی نەتەوەیەک خوەدان دەولەت و دەستھەڵات دەردکەڤنە پێش و نها دنیایێ دا ژی ب ڤی رەنگی بەرچاڤ دبن.

ناڤهاتی زەلالکر: ''پرۆسەیا ریفراندۆما سەرخوەبوونێ ئێدی دەرگەھەکە نوو ل بەرھەمی ژیانا و کوردایەتیێ ڤەدکر. د سەری دا ئێدی دێ نێرنا کوردان ب خوە ل ھەمبەری وان ب خوە و ل ھەمبەری جیهانێ ژی هێتە گوھارتن. ھەلبەت دێ نێرینا دنیایێ ژی ل ھەمبەری کوردان هێتە گوھارتن. ئێدی دنیا ژی دێ ب چاڤەکە دی ل کوردان تەماشەکەت.''

کاروان باعەدری