پێشمەرگەیێ کوردستانێ پلەیا سیێ لسەر ئاستێ جیهانێ بدەستخوڤە ئینا

دهۆک-KDP.info-  پێشمەرگەیێ کوردستانێ پشکدارى بەریکانەکا سەربازى بوون ل وەلاتێ ئەلمانیا، کۆ شیان پلەیا 3 لسەر سەرجەمى 58 وەلاتان بدەست خوڤە بینن.

پێشمەرگەیێ کوردستانێ دماوەیێ سێ سالاندا هەر ژ 2014 تا 2017ێ، شیان دشەرێن دژواردا دژى مەزنترین رێکخراوا تیرۆرى یا داعشێ سەرکەفتنان تومارکەن، پشتى تیرۆرستان هەولا شەرى دژى هەرێما کوردستانێ کرى، تا وێ رادەیێ پێشمەرگەیى دەڤەرێن دەرڤەیى ئیدارا هەرێما کوردستانێ ژى ئازادکرن، کۆ لەشکەرێ عیراقێ نەشیایى کنترۆلێ لسەر وان دەڤەران بکەن و رادەستى داعشان کرین، پێشمەرگەیى کوردستانێ سەنگ و هێزا خۆ نیشا جیهانێ دا، ژبەر ڤێ ئێکى پێشمەرگە بەرەڤ چەندین وەلاتێن ئورۆپى ڤە چوویە بۆ راهێنان و بەریكانێن سەربازى.

 

(ئۆمێد وەلاتێ)، ل راگەهاندنا فەرماندەییا هێزێن پێشتوانى/1، بۆ مالپەرێ فەرمیێ پارتى دیموکراتى کوردستان راگەهاند: "پێنچ پێشمەرگەیێن کوردستانێ پشکدارى بەریکانا نیشان شکاندنێ بوون ل وەلاتێ ئەلمانیا، کۆ شیان پلەیا سیێ سەرجەمى پێنچى و هەشت وەلاتان بدەستڤە بینن".

دشەرێ تیرۆرێدا، سەرۆکێ هەرێما کوردستانێ (مەسعوود بارزانى)، گازیا هەمى وەلاتێن جیهانێ کر پێشتەڤانیێ ل پێشمەرگەیى کوردستانێ بکەن، وەلاتێ ئەلمانیا ژى ئێک ژ وان بوویە یێن بهێز هاریکاریا پێشمەرگەیێ کوردستانێ کرى، (ئۆمێد وەلاتى)، گۆتژى: "پێشمەرگەیێ کوردستانێ ب فەرمى هاتبوونە داخوازکرن، ئەڤ بەریکانە ل پەیمانگەها بۆندس شبراخن ئامت ل باژێرێ کولن یێ ئەلمانى هاتبوو رێکخستن".

هەلز عەلى سەلیم