وه‌زاره‌تى پێشمه‌رگه، وه‌ڵامى سه‌رۆكى ئه‌ركانى هێزه چه‌كداره‌كانى ئێران ده‌داته‌وه
هه‌ولێر-KDP.info- گوته‌بێژى وه‌زاره‌تى پێشمه‌رگه‌ى حكوومه‌تى هه‌رێمى كوردستان، وه‌ڵامى سه‌رۆكى ئه‌ركانى هێزه چه‌كداره‌كانى ئێران ده‌داته‌وه.
له لێدوانه‌كه‌یدا گوته‌بێژى وه‌زاره‌تى پێشمه‌رگه رایگه‌یاندووه، ئەنجامدانی ڕیفراندۆم مافێكی ڕەوا و سروشتیی گەلی كوردستانە و جگە لە خەڵكی كوردستان هیچ كەسی تر مافی ئەوەی نییە قسەی لەسەر بكات.
ده‌قى لێدوانه‌كه گوته‌بێژى وه‌زاره‌تى پێشمه‌رگه:
بەپێی هەواڵێكی ئاژانسی هەواڵنێریی تەسنیمی ئێرانی سەرلەشكەر (باقری) سەرۆكی ئەركانی هێزە چەكدارەكانی ئێران لێدوانێكی لەبارەی ڕیفراندۆمی 25ى ئەیلوولی 2017 ـی هەرێمی كوردستان داوە و گوتویەتی ئەم ڕیفراندۆمە موستەحیلە و نابێ بكرێت.
لێرەدا بە گشت لایەكی ڕادەگەیێنین كە قسەكردن لەبارەی مافەكانی خەڵكی كوردستان كاری ئەو بەڕێزە نییە و ئەوە بە دەستێوەردانێكی ئاشكرا لە كاروباری ناوخۆی كوردستان هەژمار دەكرێت.
ئەنجامدانی ڕیفراندۆم مافێكی ڕەوا و سروشتیی گەلی كوردستانە و جگە لە خەڵكی كوردستان هیچ كەسی تر مافی ئەوەی نییە قسەی لەسەر بكات.
گوتەبێژی وەزارەتی پێشمەرگەی حكوومەتی هەرێمی كوردستان
18ـی 8ـی 2017
