بۆ بەهێزکردنى تواناى مامۆستایان و بەنێودەوڵەتیکردنى زانکۆکانى کوردستان، هەرێم و ئەڵمانیا ڕێك‌کەوتن
ھەولێر-KDP.info- بۆ خەرجکردنی تێچووی پڕۆژەیەکی گرینگی بواری خوێندنی باڵا، لە نێوان وەزارەتی خوێندنی باڵا و توێژینەوەی زانستی هەرێمی کوردستان و وڵاتی ئەڵمانیادا، یەکێتیی ئەورووپا رەزامەندی داوە و لە کۆتاییی ئەمساڵدا دەکەوێتە واری جێبەجێکردنەوە و چەندین زانکۆی هەرێمی کوردستانیش تێیدا بەشدار دەبن.
لە راگەیەندراوێکی وەزارەتی خوێندنی باڵا و توێژینەوەی زانستیی هەرێمی کوردستاندا، کە وێنەیەکیان بۆ ماڵپەڕی فەرمیی پارتی دیموکراتی کوردستان ناردووە، باس لە رێککەوتنی نێوان وەزارەتەکەیان و وڵاتی ئەڵمانیا لەسەر پڕۆژەیەکی گرینگی خوێندن دەکات، کە یەکێتیی ئەورووپا رەزامەندی لەسەر خەرجکردنی تێچووەکەی کە بڕی یەک ملیۆن یۆرۆیە داوە و، لە مانگی ١١ی ئەمساڵدا ئەو پڕۆژەیە دەچێتە واری جێبەجێکردنەوە و چەندین زانکۆی هەرێمی کوردستان تێیدا بەشدار دەبن.
وەک لە راگەیێندراوەکەدا هاتووە، ئەو پڕۆژە دەبێتە هۆی کردنەوەی دەرگایەکى دیکە بە ڕووى زانکۆکانى کوردستان لە پێناو بەرزکردنەوەى تواناى زانستى مامۆستایان و ئاشنابوون بە پێشکەوتنەکانى جیهان، جیا لەوەش پڕۆژەکە دەرفەتى خوێندنى باڵا/ ماستەر و دکتۆرا بۆ خوێندکارانى کورد لە زانکۆکانى ئاڵمانیا و چیک دەڕەخسێنێت.
راگەیێندراوەکەی وەزارەتی ناوبراو ئاماژە بە بەشداریکردنی هەر یەکە لە زانکۆکانی وەک: (سەڵاحەددین/ هەولێر، سلێمانى، چەرموو، ڕاپەڕین، هەڵەبجە، زانکۆى پۆلیتەکنیکى هەولێر، سلێمانى و دهۆک) دەکات و، پڕۆژەکە تایبەت دەبێ بە دروستکردن و بەهێزکردنى تواناى مامۆستایان و بەنێودەوڵەتیکردنى زانکۆکانى کوردستان.
