میر کامیران خێری بەگ: ریفراندۆم چارەسەرییە بۆ ناوچەیێن ئێزدی یێن هەلاویستی
دهۆک-KDP.info- ئەندامەکی خۆلا بۆری یا پەرلەمانێ عیراقێ ل سەر لیستا پارتی و ئێک ژ کەسایەتیێن بنەمالا میرێن ئێزدییانە گۆت: ''پێدڤیە هەموو کوردێن جیهانێ و کوردستانێ یێن کو د چارچۆڤێ کوردستان و نە کوردستانێ دا دەنگێ خوە بلند کەن بۆ جیهانێ و، سەربەخۆبوون و ئاڵا خۆ و زمانێ خۆ ب رێکا ریفراندۆمی بۆ جیهانێ بدەنە ناسکرن.
ل 7 حزیرانا 2017 د کۆمبوونەکا بەرفرەهـ یا لایەنێن سیاسی دا ب سەرپەرشتیا (سەرۆک بارزانی) بریار هاتە دان ل 25 ئەیلولا ئەفساڵە ریفراندۆم بۆ سەربەخۆییا کوردستانێ بهێتە کرن.
(میر کامیران خێری بەگ)، بۆ مالپەرێ فەرمیی یێ پارتی دیموکراتی کوردستان گۆت: ''وەک چاوان جیهانێ هەمووێ ماف هەیە خودان وەلات بیت، بلا مە ژی ئەو ماف هەبیت وەک هەموو جیهانێ، د خیانەتا سیکس پیکۆ دا زوڵم و ستەم ل مللەتێ کورد هاتە کرن، بەلێ نها چ سایکس پیکۆ نەماینە، ئەڤرۆ رۆژ ئەو سیستەمێ پەیمانێن وان داناین نها داخستیە و، ژناڤ دبەن، ونەخشەیەکی سیاسی نووی کەفتیە جیهانێ. گەلین ئازادیخوازێن جیهانێ پشتەڤانیا ریفراندۆما کوردستانێ دکەن، ژبەر ڤێ یەکێ ژی پێدڤیە هەموو پارتێن سیاسیێن کوردان ئیکبگرن و، رێکخستنەک بۆ ڤێ پرسا نەتەوەیی هەبیت، دا کو ل نێزیک ئالآ مە ل نەتەوەیین ئیکگرتی بهێتە بلندکرن.''
د کۆمبوونا 7 حزیرانێ دا بریار هاتە دان کو نافچەیێن کوردستانێ یێن ژ دەرڤەری ئیدارا هەرێـمێ پشکداریی د ریفراندۆمێ دا بکەن و، زۆربەیا ناوچەیێن ئێزدییان دکەڤنە وان ناوچا، چ گرنگیەک هەیە؟ سەبارەت ڤێ پرسێ ژی ناڤهاتی گۆت: ''داخوازێ ژ هەموو ئێزدییان دکەم، ل 25 ئەیلولا ئەڤ ساڵە بەرەڤ سندۆقێن نیڤدەولەتی بچن، ژبۆ وێ چەندێ کو جارەکا دی کارەسات ب سەر مە دا دووبارەنەبن.''
ئەو چەندە ژی زەلال کر، ''داخوازێ ژ هەرێما کوردستانێ دکەم کو ب زووترین دەم شنگالێ ئاڤەدان بکەن، ڤەگەرێتە هەمبێزا کوردستانێ وەک بەرسڤەک بۆ نەیارێن کوردستانێ و ئیزدییان، دا کو بزانن هیشتا کوردێن ئێزدی ل سەر بریارێن خوەنە بتنێ یین کو هاریکاری و بۆ ئێزدییان کری کوردستانە و ستارگەهەکا ئارامە ل رۆژهەلاتا ناڤین.''
(میر کامیران خێری بەگ) ل دوماهێی گوت: ''مە چ خۆشی ل گەل عیراقێ نەدیتیە، ئەڤە نە بتنێ کارەساتەکە ب سەرێ ئیزدییان هاتی، بەلکو پشتی سالا 2000ێ ئێزدییان دوو کارەسات دیتینە و، هەتا نهۆ حکومەتا عیراقێ هاریکاریا ئیزدییان نەکریە، ژبەر هندێ مە دڤێت د کوردستانێ دا بژین، و کوردستان ژی هەموو داخواز یێن ئێزدیان جیبەجێ بکەن.''
کاروان باعەدری
