ریبوار رەمەزان بارزانى: عیراق بەرپرسیارە ب جینوسایدکرنا هەشت هزار بارزانیان
بارزان-KDP.info- رێڤەبەرێ شەهیدان و ئەنفال ل بارزان راگەهاند، جینوسایدکرنا بارزانیان د سێ قۆناغاندا دەرباز بوویە، بلا ڤێ بیرەوەریێ بکەینە هێڤێن و ئێکرێزیا نیشتمانى بۆ سەربەخۆیا کوردستانێ، جونکى حکومەتا عیراقێ مللەتێ مە وێران و ئەنفالکریە، پشتى ئازادکرنا عیراقێ ل سالا 2003ێ، تا ئەڤرۆ ژى یا بەرهەڤ نەبوویە دانپێدانێ ب مافێن مللەتێ کورد بکەت.
چەندین جاران دەڤەران بارزان ژلایێ حکومەتا عیراقا ژناڤجوویى ڤە هاتیە سوتن و وێرانکرن، ل سالا 1983ێ، رژێما بەعس ب بەرنامەکێ رێکخستى هەشت هزار بارزانى دقۆناغێن جودادا ئەنفالکرن، (ریبوار رەمەزان بارزانى)، رێڤەبەرێ شەهید و ئەنفالان ل بارزان بۆ مالپەرێ فەرمیێ پارتى دیموکراتى کوردستان راگەهاند:" ئەڤە 34 سال لسەر جینوسایدکرنا هەشت هزار کەسێن بارزانى ژ رەگەزێ نێر بورین، کۆ ژناڤ مالێن وان ئینانە دەر و بەرەڤ بیابانا عیراقێ برن و هندەک گۆلەباران کرن و هندەک ب ساخى بن ئاخ کرن".
جینوساید بتنێ ژناڤبرنا جەستەیى کۆمەکا رەگەزان یان نەتەوەکێ یان ئایینەکى نینە، بەلکو چەندین جورێن جودا هەنە (جینوسایدا فیزیکى- بایلوژى- کەلتورى- ئابۆرى)، ژبەر ڤێ ئێکێ، ریبوار رەمەزان بارزانى گۆت:" جینوسایدکرنا بارزانیان دسێ قۆناغاندا بوریە، ئێکەم قۆناغ 31 تیرمەها سالا 1983ێ، ل ئوردگانا (قودس و قادسیە) ل قوشتەپە ل رێکا سەرەکیا هەولیر – کەرکۆک دەسپێکریە، دووڤدا ب دەه رۆژان، ل 10ێ تیرمەهێ، قۆناغا دیتر ل ئوردگانا (بەحرک و حەریر و دیانا و چەند دەڤەرێن دیتر) دەستپێکر و قوناغا سیێ، ل 1/ 10/ 1983ێ، یا جینوسادیکرنا بارزانیان مال ب مال دەسپێکر، ژبەر ئەو زەلامێن ماینەڤە دەستەسەرکرن، دیسان بارزانیێن هاتینە ئەنفالکرن ب هەمى جوران ئەشکەنجەداینە، ژبەر ڤێ ئێکێ دڤێت جینوسایدکرنا بارزانیان لسەر ئاستێ دەولى بهێنە بەحسکرن".
ئەنفالکرنا هەشت هزار بارزانیان دکەفیتە د یاسایا جینوسایدکرنێ یا سالا 1948ێدا.
رێڤەبەرێ شەهید و ئەنفالان ل بارزان زەلالکر: "هەمى برگەیێن یاسا جینوسایدا سالا 1948ێ، لسەر ئەنفالکرنا بارزان بجهدئێن، جونکى ئێک ژ بەندێن ڤێ یاسایێ دبێژیت: تا کریار دبیتە جینوساید دڤێت کەلتور و زمانەک جودا بیت، حکومەتا بەعس ژى بارزانى ژناڤ مللەتێ کورد هەلبژارتن و پاش کومکرن و دووڤدا ژناڤبرن، واتە حکومەتا ژناڤجوویى ب بەرنامەکێ دارێژتى حەزکریە جینەکا تایبەت دناڤ مللەتێ کوردا ژناڤببەت، ئەو ژى بارزانى بووینە و دەمى ژناڤبرین رەگەزێ نێر هەلبژارت، دا زارۆک و ژن ببنە ئامیرەک ددەستى حکومەتا ژناڤجوویى دا، لێ ڤێ پلانێ سەرنەگرت، لێ گۆمان تێدا نینە کۆ کارتێکرن ل دەروون و ئابۆرێ وان کریە".
(رەمەزان بارزانى) پتر بەحسى روویێ یاسایى کر و گۆت: "هەمى بەندێن جینوسایدێ لسەر بارزانیان دئێنە بجئینان، لێ حکومەتا عیراقێ و پەرلەمان و دادگەها بلندا تاوانان ل عیراقێ کێمتر خەم بووینە بەرامبەر ڤێ ئێکى، دناڤبەرا سالا2009- 2011ێ، دادگەها بلندا عیراقێ 40 روونشتن لسەر جینوسایدا بارزانیان پرێڤەبرن ب بەرهەڤبوونا کەس و کارێن جینوسایدکریان و ب بەلگە و دیکیومنێت ئاخڤتینە، راستە ل دادگەها بلندا عیراقێ بوو جینوساید، لێ دەمێ دوسە گەهشتیە پەرلەمانێ عیراقێ لوێرێ پەسەند نەکر و هاتیە راگرتن و یا دروست دڤیا وان بریارەک لگۆر یاسایێ دەرکر بایە لێ ئەڤ چەندە نەکر، جونکى لگۆر دیرۆکێ حکومەتا عیراقێ دۆژمناتیا مللەتێ کورد کریە و دانپێدان ب مافێن کوردا نەکریە، دڤێ دوسەیێ دا عیراق بەرپرسیارە و پێدڤییە داخوازا لێبورینێ ژ کوردان بکەت و خەلکێ زەرەرمەند قەرەبوو بکەت، لێ پشتراستم ڤێ ئێکى ناکەن و ئەگەر بو وان دەست بدەت دێ نوکە ژى مە جینوسایدکەن".
هەر سالا بیرەوەریا جینوسایدا بارزانیان ل گۆرستانا بارزانێن جینوسایدکرى دئێتە ساخکرن، ئەڤە سالە ژى لژێر دروشمێ (بلا جینوسایدا بارزان بکەینە هێڤێن و ئێکرێزیا نیشتمانیى بۆ سەربەخۆیا کوردستانێ) و رى و رەسەم دێ ب چەندین پرگەیێن جودا و دانانا تاجە گۆلینێ لسەر روفاتێن وان ژلایێ لایەنێن سیاسى ڤە پرێڤەجیت، دیسان دێ پتر گرنگیێ ددەنە ریفراندۆم و ئێکرێزیا ناڤمالیا کوردى و سەربەخۆیا کوردستانێ .
هەلز عەلى سەلیم
