هشیار زێبارى: حکومەتا عیراقێ پابەندى دستورى نەبوون، ئەم نەچار کرین بەرەڤ ریفراندۆمێ بچین

 

دهۆک-KDP.info- (هشیار زێبارى) ئەندامێ لێژنا بلندا ریفراندۆمێ راگەهاند، نەتەوەیێن ئێکگرتى دوو جارا بەحس ل ریفراندۆمێ کریە، ل سەر ڤێ پرسێ ئەم دشێین بیێ وان ئەنجام بدەین.

پشتى کوردان رۆلەکێ گرنگ و گاریگەر ل رۆژهەلاتا ناڤین دیتى و ب تایبەت ژناڤبرنا رژێما بەعس ل عیراقێ، ل سالا 2003ێ، دهەمان دەمدا بەرهنگاربوونا مەزنترین رێکخراوا تیرۆرى داعشێ کرى و پێشمەرگەیێ کوردستانێ شیایین ب شێوەیەکێ بەرچاڤ تیرۆرستان ل عیراق و کوردستانێ لاواز بکەن، لەوا ئێکەتیا ئورۆپى و نەتەوەیێن ئێکگرتى و روسیا ژى نوکە پالپشتیێ ل ڤێ پرسا هەرێما کوردستانێ دکەن، (هشیار زێبارى) بۆ مالپەرێ فەرمیێ پارتى دیموکراتى کوردستان گۆت: "نەتەوەیێن ئێکگرتى دوو جارا بەحس ل ریفراندۆمێ کریە، و سکرتێرێ گشتیێ نەتەوەیێن ئێکگرتى لسەر ڤى بابەتى ب ئاگەهە، ل سەر ڤێ پرسێ ئەم دشیێن بیێ وان ئەنجام بدەین".

(زێبارى) خۆیاکر: "وەزیرێ دەرڤەیى روسیا بخۆ دراگەهاندنێ دا بەحس ل ریفراندۆما هەرێما کوردستانێ کریە، ئەڤە ژى بەلگەیە کو کوردستان د پێشکەفتنەکا گەلەک مەزن دایە و بۆ وەلاتێن زلهێز ژى دیار بوویە، ریفراندۆم بابەتەکێ جدى یە، و کورد یێ بەرەڤ ڤێ پرۆسێ دچن و چ هزرێن دیتر لسەر ڤێ پرسێ ناکەت".

ئەندامێ لێژنا بلندا ریفراندۆمێ زەلالکر: "مە لبەره پەرلەمانێ کوردستانێ بەرێ ریفراندۆمێ کارا بکەینەڤە، نها دگەل لایەنێن سیاسى ددان و ستاندنێن پێشکەفتى دانە دەربارەیى ڤى پرسێ، چونکى هەمى لایەنێن دگەل هندێ نە پەرلەمان کارا بیتە ڤە".

ل 11 تیرمەها ئەڤ سالە، لێژنا بلندا ریفراندۆمێ ب سەرپەرشتیا سەرۆکێ هەرێما کوردستانێ (مەسعود بارزانى) و یێ پێکهاتى ژ چەند پێکهاتەیێن کوردستانێ سەرەدانا پەرلەمانێ ئورۆپا ل بروکسل کر و ئەنجامێن باش دووڤ خۆ هێلان، ئەندامێ لێژنا بلندا ریفراندۆمێ ئاماژەدا:" ریفراندۆم نە بتنێ بۆ تەخەکی یە بەلکو پرسەکا کوردستانى یە و هەموو پێکهاتە و حزبێن کوردستانى بخۆڤە دگریت، جونکى ئەڤ پرسە نە ژ نشکەکێ ڤە هاتیە بریاردان بەلکو کار لسەر هاتیە کرن و 16 حزبێن سیاسى ل هەرێما کوردستانێ رازمەندیا خۆ دایە، کۆ ل 25 هەیڤا 9 یا ئەڤ سالە، ئەڤ پرسە بهێتەکرن ب ئێک بازنەیى".

چەندین جارا سەرکردەیێن سیاسى ل عیراقێ راگەهاندیە، کۆ ریفراندۆم نە دەستورى و شەرعى یە و هندەک دبێژن نە دەمێ وێ یە، دەربارەیى ڤێ یەکێ ژی (هشیار زێبارى) دیارکر: "راستە سەرکردەیێن عیراقێ و (حەیدەر ئەلعەبادى) بخۆ ئەڤ داخویانیە دایە، لێ دگەل هندێ دبێژیت ژى ئەز چەکى بۆ هەرێما کوردستانێ رەوانە ناکەم، ژبەر ڤێ چەندێ ئەم ژى دبێژین ریفراندۆم مافەکێ مەیێ شەرعى و دەستورى یە، چونکى ب کەیفا چ کەسان نینە دستورى وەک خۆ و بۆ پەرژەوەندیا خو بکار بینیت و مافێن پێکهاتە و نەتەوەیێن دیتر پێشگوهـ ب هاڤێژیت، ئەگەر ئەو بێژن دستور دبێژیت عیراق یا ئێکگرتیە و خودان سەروەریە، بەلێ ما نەشێن وێ ژى بخوینن کۆ دبێژیت ژى دستور زامنێ هەموو تشتەکى یە، یێ پێکگریێ ب دستورى نەکەت و مادەیا 140 بجه نەئینیت و مافێن پێشمەرگەیى نەدەتێ و رێزێ ل پێکهاتەیێن دیتر نەگریت، ئەم نە نەچارین پێگیریێ ب وى دستورى بکەین و مافێن خۆ ژدەست بدەین، دیسان چەندین برگەیێن دیتر ددستوریدا هەنە ئەم ریفراندۆمێ ل سەر بکەین، دبیت حکومەتا هەرێمێ پابەندى دستورى نەبیت، لێ حکومەتا عیراقێ 10 جارەکى پابەند نەبوویە و دەستور بجه نەئینایە، چونکى دەستهەلات و بریار ددەستێ وان دایە نەک ددەستێ مەدایە".

هەلز عەلى سەلیم