مامۆستایەکێ زانکۆیێ: پشکداریکرنا چاڤدێران دریفراندۆمێ دا، شەرعیەتکرنا ڤێ پرۆسێ یە ژلایێ نیڤدەولەتى ڤە

 

دهۆک-KDP.info-  مامۆستایەکێ زانکۆیێ دبێژیت، پشکداریکرنا چاڤدێران ژلایێ ئێکەتیا ئورۆپى و نەتەوەیێن ئێکگرتى دپرسا ریفراندۆما هەرێما کوردستانێ، گرنگیەکا هەر مەزن ژبۆ شەرعیەتکرنا ڤێ پرۆسێ ژلایێ نیڤدەولەتى ڤە و دانپێدان ب سەربەخۆیا کوردستانێ هەیە.

ل 7ێ حوزیرانا ئەڤ سالەدا، د کومبوونەکا بەرڤره یا ١٥ لایەنێن سیاسى ب سەرپەرشتیا سەرۆکێ هەرێما کوردستانێ (مەسعود بارزانى)، بریار هاتەدان ل 25ێ ئەیلولا ئەڤ سالەدا ریفراندۆم ژبۆ سەربەخۆیا کوردستانێ بهێتە ئەنجامدان و، بۆ دەنگۆیا دەنگ و باسێن کەنالێن جیهانى.
مامۆستایەکێ زانکۆیێ دبێژیت، پشکداریکرنا چاڤدێران ژلایێ ئێکەتیا ئورۆپى و نەتەوەیێن ئێکگرتى دپرسا ریفراندۆما هەرێما کوردستانێ، گرنگیەکا مەزن ژبۆ شەرعیەتکرنا ڤێ پرۆسێ ژلایێ نیڤدەولەتى ڤە و دانپێدان ب سەربەخۆیا کوردستانێ هەیە.
(د. ئیبراهیم شەرەفانى) مامۆستایێ زانکۆیا دهۆک و چاڤدێرێ سیاسى گۆت: "پشکداریکرن و چاڤدێریا نوونەرێن سازیێن دەولى و هەرێمایەتى مینا (رێکخراوا نەتەوەیێن ئێکگرتى و ئێکەتیا ئوروپى) دپرۆسا ریفراندۆمێ دا بابەتەکێ گەلەک گرنگ و هەستیاره، جونکو زێدەبارى دانا رەواتیێ ب پرۆسێ، دانپیدانەکا فەرمى یا نیڤدەولەتى یه ب ریفراندۆما کوردستانى ژ رویى یاسایى ڤه، دیسان دانانا بنەمایەکێ یاسایى یه بۆ دانپێدانى ب دەولەتا کوردستانێ لسەر ئاستێ دەولى".

ل 10ێ تیرمەها ئەڤ سالە، (سەرۆک بارزانى) دگەل شاندێ جڤاتا بلندا ریفراندۆمێ، سەرەدانا پەرلەمانێ ئورۆپا ل برۆکسل کر، چەندین سیاستمەدار و ئەندام پەرلەمان و چاڤدێر و چالاکڤانێن سیاسى یێن ئورۆپى دیتن، کۆ دکومبوونا 11ێ تیرمەهێ دا، ل پەرلەمانێ ئێکەتیا ئورۆپى بریار هاتەدان چاڤدێرێن سیاسى ژ ئێکەتیا ئورۆپى پشکدارى پرۆسا ئەنجامدانا ریفرادۆما هەرێما کوردستانێ بن و ب تایبەت بەحس ل نوونەرێن کرێستیان هاتە کرن.

(د. ئیبراهیم شەرەفانى) دەبارەیى ڤێ چەندێ،  بۆ مالپەرێ فەرمیێ پارتى دیموکراتى کوردستان راگەهاند: "یا خویایه ریفراندۆم پرسەکا نشتیمانى یا خەلکێ کوردستانى یه، لەوا گرنگه هەموو پێکهاتەیێن وێ نه خاسمه کریستیانى و بێ جوداهى نوونەرێن خو دگشت ویستگەهێن پرۆسیسا ریفراندۆمێ دا هەبن، ژبۆ پشتراستکرنا ئەنجامێن ریفراندۆمێ".

هەر پرسەکا ل رۆژهەلاتا ناڤین یا گرنگ نەبیت (نەتەوەیێن ئێکگرتى و نەتەوەیێن ئورۆپى) بەحس لێ ناکەن، لەوا پرسا ریفراندۆما سەربەخۆیا کوردستانێ رەنگە جوگرافیا رۆژهەلاتا ناڤین بگهوریت، ژبەر ڤێ ئێکێ ئەڤ پرسە لسەر ئاستێ نیڤدەولەتى ب گرنکى ڤە هاتە وەرگرتن. مامۆستایێ زانکۆیا دهۆک گۆت ژى: "دان و ستاندنکرنا پرسا ریفراندۆما کوردستانى دپەرلەمانى ئێکەتیا ئۆرۆپى دا گروڤێ نیڤدەولەتیکرنا دۆزا رەوایا مللەتێ کوردە ژ روویێ یاسایى ڤه، دهەمان دەمدا نیشانا دارێشتنا رێکارین یاسایى یه لدووڤ یاسایێن نیڤدەولەتى و دەستورى بۆ چارەسەرکرنا وێ برێکێن  ئاشتیانە".

(شەرەفانى) گۆت ژى: "ب باوەریا من  جڤاکى دەولى و ئێکەتیا ئورۆپا ب تایبەتى دى پەسنا بریارا سەروکاتیا هەرێما کوردستانێ کەن، لدور پەیرەوکرنا ریفراندۆمێ، ل ٢٥/ ٩/ ٢٠١٧ێ، ژبۆ پیادەکرنا مافێ خۆ چارەنڤیسى، وەک مافەکێ سرۆشتى و یاسایى لدووڤ میساقا رێکخراوا نەتەوەیێن ئێکگرتى و جارناما جیهانى یا مافێن مرۆڤى و هەر دوو پەیمانێن دەولى یێن مافێن مرۆڤى، ل سالا ١٩٦٦ێ، هەروەسا سەرخوبوونا کوردستانێ ژ دەولەتا عیراقا فیدرال".

هەلز عەلى سەلیم