نەورۆز مەولوود: ٧٣ ملیۆن داھاتی گەشتیاری بووە
ھەولێر-KDP.info- وەزیری شارەوانی و گەشتوگوزاری حکوومەتی ھەرێمی کوردستان گوتی، لەم جەژنەدا ٢٤٣ ھەزار گەشتیار ھاتوونەتە ھەرێمی کوردستان و، ٧٣ ملیۆن داھاتەکەی بووە. ئەمەش بەراورد بە ساڵی رابردوو نزیکەی ١٠٠ھەزار گەشتیار زیادی کردووە.
وەزیری شارەوانی و گەشتوگوزاری حکوومەتی ھەرێمی کوردستان (نەورۆز مەولوود) لە کۆنفڕانسێکی ڕۆژنامەوانیدا ڕایگەیاند، لە ٢٣ی حوزەیران تاکو ١ی تەمموز، ٢٤٣ ھەزار گەشتیار لە دەروازە و بازگەکانی ھەرێمی کوردستان بۆ جەژنی ڕەمەزان ھاتوونەتە ھەرێمی کوردستان. ھەروەھا ڕایگەیاند، لەم ماوەدا ٧٣ ملیۆن دۆلار داھاتی گەشتیاری بووە بۆ کەرتی تایبەت، لە سەدی٧٠ـی گەشتیارانیش لە خوارو ناوەڕاستی عێراق ھاتوون.
(نەورۆز مەولود) ھۆکاری زیادبوونی ژمارەی گەشتیارانیشی گەڕاندەوە بۆ پلانی وەزارەتی شارەوانی و گەشتوگوزار و دەستەی گشتیی گەشتوگوزار، هەروەها پاڵپشتیی سەرۆکی حکوومەتی ھەرێمی کوردستان و ھاوکاریی دامودەزگاکان بە گشتی و کارئاسانی دەزگا ئەمنییەکان بە تایبەت، ھەروەھا ھۆکارێکی دیکەی زیابوونی ژمارەی گەشتیارانی بۆ زیادکردنی خزمەتگوزاری بۆ گەشتیاران و نۆژەنکردنەوەی ژمارەیەک شوێنی گەشتیاری و دابینکردنی خزمەتگوزاری بۆ ژمارەیەک شوێنی نوێی گەشتیاری گەڕاندەوە.
ساڵی ڕابردوو لە ھەمان کات ١٢٢ ھەزار گەشتیار بووە، واتە نزیکەی سەد لە سەد زیادی کردووە.
بڵند ئیبراھیم
