مه‌سروور بارزانی و محەمەد حاجی مەحموود پرسی سەربەخۆیی کوردستانیان خستە بەرباسەوە
هەولێر-KDP.info- ئه‌مڕۆ 1/6/2017 (مه‌سروور بارزانی) راوێژكاری ئه‌نجوومه‌نی ئاسایشی هه‌رێمی كوردستان پێشوازی له (محه‌مه‌د حاجی مه‌حمود) سكرتێری گشتیی حزبی سۆسیالیستی دیموكراتی كوردستان كرد و لە دیدارەکەدا پرسی سەربەخۆیی کوردستانیان خستە بەرباسەوە.
له دیدارێكدا گفتوگۆ له‌باره‌ی په‌ره‌سه‌ندنه سیاسی و سه‌ربازییه‌كانی ناوچه‌كه و ره‌وشی ناوخۆی كوردستان و ئه‌گه‌ر و پێشهاته‌كانی دوای كۆتایهاتنی شه‌ڕی داعش كرا. له ئاماژه‌یه‌كدا بۆ پرسی سه‌ربه‌خۆیی كوردستان باس له‌وه‌كرا، كه خه‌ڵكی كوردستان له‌و پرسه پاشگه‌زنابێته‌وه، چونكه سه‌روه‌ری و سه‌ربه‌خۆیی تاكه گه‌ره‌نتی رزگاربوونی یه‌كجاری خه‌ڵكی كوردستان و دووباره‌نه‌بوونه‌وه‌ی ئه‌و سته‌م و كاره‌ساته‌یه، كه به‌سه‌ر كورد هێنراون. له به‌شێكی دیكه‌ی دیداره‌كه‌دا هه‌ردوولا جه‌ختیان له بایه‌خی كۆده‌نگی و یه‌كڕیزی هێز و لایه‌نه سیاسییه‌كانی كوردستان و به‌شداریكردنی هه‌مووان له پرسه نیشتمانی و چاره‌نووسسازه‌كان كرده‌وه به ئامانجی به‌دیهاتنی به‌رژه‌وه‌ندییه‌كانی خه‌ڵكی كوردستان و دابینكردنی ئاینده‌یه‌كی گه‌شتر بۆ نه‌وه‌كانی داهاتوو.
باسكردن له رێكخستنه‌وه‌ی زیاتری هێزی پێشمه‌رگه به مه‌به‌ستی ئاماده و به‌هێزكردنی ته‌وه‌رێكی دیكه‌ی دیداره‌كه بوو.
