سەرۆك بارزانی: پێویستە پەلاماردانی عەفرین بوەستێندرێ، تا دەرئەنجامی خەراپی لێ نەكەوێتەوە

 

هەولێر-KDP.info-  سەرۆك بارزانی بە هێرشەكانی سەر شاری عەفرین کە لە لایەن هێزەکانی سوپای تورکیاوە بەرپا کراوە، نیگەرانە و لە پەیامێکدا داوا دەکات، بە زووترین كات ئەو پەلامارانە ڕاوەستن و گیانی هاووڵاتیان پارێزراو بێت و چیتر لەوە زیاتر تەشەنە نەكات، تا كارەسات و دەرئەنجامی خەراپی لێ نەكەوێتەوە.

دەقی پەیامی سەرۆك بارزانی:

بە ناوی خودای بەخشندە و میهرەبان
بە هێرش و بوردمانەكانی سوپای توركیا و چەند لایەنێكی تر بۆ سەر شاری عەفرین و گیانلەدەستدان و قوربانیبوونی خەڵكی سڤیلی ئەو شارە زۆر نیگەرانین.
هیوادارین بە زووترین كات ئەو پەلامارانە ڕاوەستن و گیانی هاووڵاتیان پارێزراو بێت و چیتر لەوە زیاتر تەشەنە نەكات و كارەسات و دەرئەنجامی خەراپی لێ نەكەوێتەوە. بەپێی هەموو ئەزموونەكانی ناوچەكە، بە شەڕ و توندوتیژی قەیران و كێشەكان قووڵتر و فراوانتر دەبن. باشترین ڕێگە ئەوەیە بە شێوازی ئاشتیانە چارەسەری قەیران و كێشەكانی ناوچەكە بكرێت.

مەسعوود بارزانی
22ـی 1ـی 2018