کۆچەر دۆسکى: خەلاتکرنا من ل نەتەوەیێن ئێکگرتى، گەهاندنا پەیاما پێشمەرگەیێ کوردستانێ یە

 

دهۆک-KDP.info-  ئەفسەرەکا پێشمەرگەیێ زێرەڤانى راگەهاند، ل نەتەوەیێن ئێکگرتى دێ خەلاتێ دژى توندرەویێ و نەلێبورینێ لێ ئێتە بەخشین، لێ خواست خەلاتێ وێ سەرکەفتنا ریفراندۆمێ و پەیاما سەربەخۆیێ و دامەزراندنا دەولەتا کوردى بیت.

(کۆچەر دۆسکى)، ئەفسەرا پێشمەرگە و سەرلەق سەر فەرماندەیا پێشمەرگەیێ زێرەڤانى، بۆ مالپەرێ فەرمیێ پارتى دیموکراتى کوردستان گۆت: "رۆژەکا دیرۆکى یە بۆ من و مللەتێ کورد و ب تایبەت پێشمەرگەیێن قەهرەمان، براستى هەستەكێ زێدە پیرۆزە وەک کجەکا پێشمەرگە و کورد خەلاتەکى ژ نەتەوەیێن ئێکگرتى وەربگرم ".

ئەفسەرا پێشمەرگە خویاکر: "پەیاما سەرۆکێ هەرێما کوردستانێ (مەسعوود بارزانى) و پێشمەرگەیێ چاڤنەترس و خێزانێن شەهیدان، دێ دگۆتارەکێ ل نەتەوەیێن ئێکگرتى خوینم، ژبەر دەمێ دبن دەستیێ دا مە گۆه ل ناڤێ کوردان ببایە ل دەزگەهەکێ راگەهاندنێ کەیڤا مە مینا دونیایەکێ دهات، لێ ئەڤرۆ ئەم بخۆ د ئازاد و پەیاما دەولەتبوونا کوردستانێ نیزیک بوویى، مەزنترین هیڤى و ئۆمێدە".

(کۆچەر دۆسکى)، دیارکر ژى: "ئەڤە دیرۆکەکا پرى شانازى یە بو خەلکێ مە و پێشمەرگەیى، کۆ خەلاتێ دژى توندرەویێ و نەلێبورینێ ژ نەتەوەیێن ئێکگرتى وەربگرم، کۆ ئەڤ خەلاتە ژلایێ رێکخراوا هەڤپەیمانیا هیوا یا جیهانى و ب هەماهەنگى دگەل حکومەتا هەرێما کوردستانێ بوویە".

هەلز عەلى سەلیم