پێشمەرگەیێن ئەیلول و گولانێ: دهۆکیان عەرشێ نەحەزان هەژاند

 

دهۆک-KDP.info-  مەزنترین کەرنەڤال بۆ سەربەخۆیا کوردستانێ ل باژێرێ دهۆکێ هاتە ئەنجامدان، نیزیکى 100 هزار کەسان تێدا پشکدار بوون و پەیاما سەربەخۆیێ گەهاندە دوست و دۆژمنان ژبۆ ئازادى و دامەزراندنا دەولەتا کوردى.

(سادق ئەحمەد گەلناسکى)، پێشمەرگەیێ هەر دوو شورەشێن ئەیلول و گولانێ و هەلگرێ میدالیا بارزانیێ نەمر، بۆ مالپەرێ فەرمیێ پارتى دیموکراتى کوردستان گۆت: "رۆژەکا دیرۆکى یە بۆ مللەتێ کورد و ب تایبەت پێشمەرگەیێن قەهرەمان، براستى کەیڤخوشم ئەڤرۆ ڤى جەماوەرێ هندێ خوین گەرم دبینم ژبۆ ئازادیا وەلاتى کومبووین، هیڤیەکا مەزن مە هەیە دێ ل نیزیک بینە دەولەت".

پێشمەرگەیێ هەر دوو شورەشێن ئەیلول و گولانێ خویاکر: "گەلەک یێ گەشبین بووم ب ئێکگرتنا کوردان، ژبەر ئەڤرۆ دهۆکێ عەرشێ دۆژمنان شکاند و ئێکرێزیا مللەتێ کورد نیشا هەمى نەحەز و جیهانێ دا ب پشکداریا هەمى لایەنێن سیاسى ل دەڤەرێ".

 

(رزگار کێستەیى) پێشمەرگەیێ شورەشا گۆلانێ و ئێک ژ رێکخەرێن کەرنەڤالێ جەماوەرێ دهۆکێ دیارکر: "ئەڤە دیرۆکەکا پرى شانازى یە خەلکێ دهۆکێ تومار کرى، نیزیکى 100 هزار کەسان بەرهەڤببوون و گەلەک نەشیان بەرهەڤبن، کۆ جه نە مابوو، ئەڤە ژ ئەنجامێ خوراگرى و ڤیان و گەرماتیا سۆز و دلسۆزیا وان بوو، ژبەر هندێ پەیامەکا گەلەکا بهێز دا دوست و دۆژمنان یێن دبێژن کوردان سەربەخۆیى نەڤێت".

(رزگار کێستەیى)، پتر بەحسکر: "ئەگەر بۆ ئازادى و دەولەتێ نەبیت، بۆ چ تشتەکى دیتر جەماوەرێ دهۆکێ بڤى رەنگى کوم نابیتەڤە".

 

هەلز عەلى سەلیم