مەكتەبی سیاسیی پارتی: هەڵوێستە نیشتمانی و نەتەوەییەكانی پارێزگاری كەركووك بەرز دەنرخێنین
__2017_06_09_h15m57s25__RM.jpg)
هەولێر-KDP.info- مەكتەبی سیاسیی پارتی دیموكراتی كوردستان، بڕیاری ئەنجوومەنی نوینەرانی عێراق بۆ لادانی (د. نەجمەددین کەریم) لە پۆستی پارێزگاری کەرکووک، ڕەت دەکاتەوە و پشتیوانیی بێسنوریش بۆ پارێزگاری كەركووك دەردەبڕێ و هەڵوێستە نیشتمانی و نەتەوەییەكانی بەرز دەنرخێنێ.
دەقی راگەیاندراوەکە:
بڕیاری ناڕەوا و نایاسایی لادانی بەڕێز (دكتۆر نەجمەدین كەریم) لە پۆستی پارێزگاری كەركووك بە توندی ئیدانە و رەتدەكەینەوە.
بەم بڕیارە بێ بنەمایە كە هیچ ئیعتبارێكی نییە، جارێكی دیكە دەسەڵاتدارانی بەغدا سەلماندییان كە هیچ نرخ و بەهایەك بۆ شەراكەت و شەرعیەت و تەوافوق و دەستوور و متمانەی گەل و دەنگ و ڕای هاووڵاتییان دانانێن و كۆی ئەو پرنسییانەیان ژێرپێناوە كە عێراقی نوێی لەسەر دامەزرا.
ئەم بڕیارە نابەجێیە، ئاماژەیەكی روونە بۆ ئەو سیستمە سیاسییەی دەیانەوێت بەزەبری دیكتاتۆریەتی زۆرینە بیسەپێنن و كۆدەتایەكی بێمنەتە بەسەر دەستوور و دیموكراتی تەوافوقی و حوكمی ئیتیحادیی و بەسەر خودی پەرلەمانەكەی عێراقدا.
ئێمە لە لای خۆمانەوە ئەم جۆرە دەستوەردان و مەركەزییەتە ملهوڕانەیە بە توندی ڕەت دەكەینەوە. پشتیوانی بێسنوریش بۆ جەنابی پارێزگاری كەركووك (دكتۆر نەجمەدین كەریم) دەردەبڕین و هەڵوێستە نیشتمانی و نەتەوەییەكانی بەرز دەنرخێنین.
مەكتەبی سیاسیی
پارتی دیموكراتی كوردستان
14/9/2017
