سه‌رۆك بارزانی بۆ وه‌زیری به‌رگریی ئه‌مه‌ریكا: ڕیفراندۆم ده‌ستوورییه و كێشە بۆ شەڕی تیرۆر دروست ناكات
هه‌ولێر-KDP.info- له كۆبوونه‌وه‌یدا له‌گه‌ڵ وەزیری بەرگریی ئەمەریكادا، (سەرۆك بارزانی) ڕاگەیاند، كە ڕیفراندۆم بابەتێكی شەخسی نییە و مافی گەلە و لەگەڵ هیچێك لە پڕەنسیپەكانی مافی مرۆڤ و دیموكراسی ناكۆك نییە و، بە هیچ شێوەیەك كێشە بۆ شەڕی تیرۆر دروست ناكات. گوتیشی، دەستووری عێراقیش ئەو مافەی بە گەلی كوردستان داوە كە لە دیباچەكەیدا بە ڕوونی ئاماژە دراوە كە پابەندبوون بە دەستوور مەرجە بۆ مانەوەی عێراق بە یەكپارچەیی.
ئه‌مڕۆ سێشەممە 22ـی 8ـی 2017 لە شاری هەولێر، (مەسعوود بارزانی) سەرۆكی هەرێمی كوردستان، پێشوازی لە (جێمز ماتیووس) وەزیری بەرگریی ئەمەریكا و شاندێكی یاوەری كرد، كە پێكهاتبوو لە (برێت مەكگۆرگ) نێردەی تایبەتی سەرۆكی ئەمەریكا بۆ هاوپەیمانێتیی شەڕی دژی داعش و (دۆگلاس سڵیمان) باڵیۆزی ئەمەریكا لە عێراق و ژمارەیەك لە بەرپرس و ڕاوێژكاری وەزارەتی بەرگریی ئەمەریكا.
لە دیدارەكەدا كە (كۆسرەت ڕەسووڵ عەلی) جێگری سەرۆكی هەرێم و ژمارەیەك لە بەرپرسە ئیداری و سیاسی و سەربازییە باڵاكانی هەرێم ئامادەی بوون، (سەرۆك بارزانی) بە گەرمی بەخێرهاتنی وەزیری بەرگریی ئەمەریكا و شاندی یاوەری كرد و سوپاسی گەل و حكوومەتی ئەمەریكای كرد كە لە شەڕی تیرۆریستاندا یارمەتیی گەلی كوردستانیان داوە و ئەوەیشی خستەڕوو، كە ''هەروەكچۆن لە سەرەتاوە لەسەر شەڕی تیرۆر سوور بووین لە ئێستا و لە داهاتوویشدا پێداگیر دەبین لە دژایەتیكردنی تیرۆر''، ئەوەیشی ڕاگەیاند، كە ''ئازادبوونی مووسڵ بە مانای تەواوبوونی داعش نییە و تیرۆر هەڕەشەیەكی بەردەوامە كە سنوور ناناسێ، بۆیە هەمیشە پێویستیمان بە هەماهەنگی و هاوكاریی یەكتر هەیە بۆ ئەوەی تیرۆر تێكبشكێت و كاریگەریی نەمێنێت.''
دواتر وەزیری بەرگریی ئەمەریكا ئامانجی هاتنی بۆ كوردستان و دیداری لەگەڵ (سەرۆك بارزانی) بۆ دەربڕینی سوپاس و پێزانین بۆ هێزی پێشمەرگە و سەرەخۆشی لە كەسوكاری شەهیدانی پێشمەرگە لە قەڵەم دا و ئەوەی دووپات كردەوە، كه بەبێ پێشمەرگە سەركەوتن لە دژی تیرۆریستان بەدی نەدەهات و سووربوونی وڵاتەكەی لەسەر ڕووبەبەڕووبوونەوەی تیرۆر ڕاگەیاند و ئەوەیشی باس كرد، كە بۆ ئەمەریكا شانازییە پشتیوانی پێشمەرگە بووە و هاوكاری و هەماهەنگیی نێوان هەردوولا زۆر گرینگە بۆ مسۆگەركردنی سەركەوتن و، ویستی وڵاتەكەیشی خستەڕوو بۆ پابەندبوون و بەردەوام بوون لەبەرانبەر دوژمنی هاوبەش كە تیرۆرە.
پرسی ڕیفراندۆم و مافی گەلی كوردستان بۆ دیاریكردنی چارەنووس، تەوەرێكی دیكەی ئەو كۆبوونەوەیە بوو و، تێیدا وەزیری بەرگریی ئەمەریكا تێگەییشتنی خۆی بۆ قووڵاییی ماف و داواكاریی گەلی كوردستان و مێژوو و خەبات و نەهامەتییەكانی خستەڕوو و ئاماژەیشی بە نیگەرانییەكان و هەڵوێستی وڵاتەكەی لە هەمبەر ئەنجامدانی ڕیفراندۆم دا و ڕایگەیاند، كە ڕیفراندۆم دوور بوو لە پێشبینییەكانی وڵاتەكەی و ئەمەریكا وای بۆ دەچێ، كە ڕەنگە ئەو پڕۆسەیە كۆسپ لەبەردەم شەڕی داعش دروست بكات و كێشەیش بۆ كاری هاوبەشی هەردوولا لە شەڕی تیرۆر دروست بكات.
وەزیری بەرگریی ئەمەریكا دانوساندنی نێوان هەولێر و بەغدای بە بابەتێكی باش زانی و ڕایگەیاند كە وڵاتەكەی پشتیوانی دانوساندن و حیواری بەردەوامی نێوان هەرێم و بەغدا دەكات.
هەر سەبارەت بە پرسی ڕیفراندۆم، (سەرۆك بارزانی) ئەوەی بە شاندی میوان ڕاگەیاند، كە ڕیفراندۆم بابەتێكی شەخسی نییە و مافی گەلە و لەگەڵ هیچێك لە پڕەنسیپەكانی مافی مرۆڤ و دیموكراسی ناكۆك نییە و، بە هیچ شێوەیەك كێشە بۆ شەڕی تیرۆر دروست ناكات.
لە درێژەی وتەكانیدا (سەرۆك بارزانی) باسی نەهامەتییەكانی گەلی كوردستانی كرد لە ژیان لەگەڵ دەوڵەتی عێراق و پێشێلبوونی دەستوور و نەمانی پڕەنسیپی شەراكەت و تەوافوق و گوتیشی، دەستووری عێراقیش ئەو مافەی بە گەلی كوردستان داوە كە لە دیباچەكەیدا بەڕوونی ئاماژە دراوە كە پابەندبوون بە دەستوور مەرجە بۆ مانەوەی عێراق بە یەكپارچەیی.
(سەرۆك بارزانی) ڕاشیگەیاند، ''یەكگرتنی بەزۆر، هیچ كات سەركەوتوو نەبووە و ئێمە یەكگرتنی ئارەزوومەندانەمان هەڵبژارد بە مەرجی شەراكەت، بەڵام چونكە شەراكەت سەری نەگرت و لەپێناو ڕێگەگرتن لە كێشەی قووڵتر دەمانەوێ وەك دوو جیرانی باش لە تەنیشت یەكتر بژیێن.''
(سەرۆك بارزانی) ئەوەیشی خستەڕوو كە هەر داوایەك بۆ دواخستنی ڕیفراندۆم دەبێ بەدیلی هەبێت و، ئەو بەدیلەیش دەبێ بەهێزتر بێت لە ئامرازی ڕیفراندۆم.
(سەرۆك بارزانی) جەختیشی لەوە كردەوە كە گەلی كوردستان شێوازی ئاشتیانە و دوور لە توندوتیژی بۆ مسۆگەركردنی مافەكانی گرتووەتەبەر و، لە دانوساندن بەردەوام دەبێت بۆ دیاریكردنی سرووشتی پەیوەندیی خۆی لەگەڵ عێراق، بۆ ئەوەی بگەنە قەناعەت كە هەردوولا وەك جیران لەگەڵ یەكتردا بژیین.
لە كۆتاییدا هەردوولا كۆك بوون لەسەر بەردەوامبوونی پەیوەندیی دووقۆڵی.
