٢١ی تشرینی دووەمی ٢٠٢٦
پارتی دیموکراتی کوردستانئازادی، دیموکراسی، دادپەروەری
شرۆڤه‌ و بۆچوون

کردار، ئیرادە و داهاتوو، کارنامەیا مەسرور بارزانی

سەرچاوە: KDP.info

د. شیرین حوسنی

د ناڤ ژینگەهەکا سیاسی دا کو هەندەک دەنگ و هەڵوێست هەوڵ ددەن ب نرخێ بانگەشە، دروستکرنا گومان و شێواندنا ڕاستییان، متمانەیا گشتی لاواز بکەن، پێدڤیە وێ راستیێ ژ بیر نەکەین کو مێژوو ب دروشم و هەڵمەتان ناهێتە نڤیسین، بەلکو ب کردار، قوربانی، ئیرادە و دەستکەفتان دهێتە پێڤانەکرن. د ناڤ هەر ناکۆکییەکا سیاسی دا، ئەوا دمینیت کردار و ئەنجامە، نە قەبارەیا دەنگ و بانگەشەیان.

پارتی دیموکراتی کوردستان، وەک ئێک ژ ستوونێن سەرەکی یێن خەبات، دامەزراندن و پاراستنا قەوارەیا هەرێما کوردستانێ، مێژوویەکا پڕ ژ قوربانی و خەباتێ هەیە. ئەو مێژوو شانازیە، بەرپرسیاریەتییەکا مەزنە بۆ بەردەوامیێ، خۆنویکرن و پێشکەفتنێ. پاراستنا وان دەستکەفتان پێدڤی ب هەمان ورەیا خەباتێ، لێ ب شێوازێن نوو و بەرسڤدانا پێداویستییێن نفشێ نوو دکەت. ئەڤە ژی ب کارکرن، نیشاندانا ڕاستییان و دانپێدان ب کێشە و کەموکوڕییان و چارەسەرکرنا وان دهێتە ئەنجامدان.

د ڤی چوارچووڤی دا، حکوومەتا هەرێما کوردستانێ ل ژێر سەرۆکایەتییا جەنابێ کاک مەسرور بارزانی، بەرپرسیاریەتییەکا گرنگ ل ئەستۆ گرتییە. ل ساڵێن دەستەلاتداریا حکوومەتێدا، چەندین بوار بۆ چاکسازی و گۆڕانکاریێن دامەزراوەیی و خزمەتگوزاریی جهێ گرنگیدانێ بوینە، ب تایبەتی د دیجیتاڵکرنا خزمەتگوزارییان، پەرەپێدانا ئابووریێ، وەبەرهێنان، وزە و ژێرخانێدا. ئەڤ بوارە بەشەکن ژ هەوڵدانەکا مەزنتر بۆ گۆڕینا شێوازێ حکوومەتداریێ و ڤەگوهاستن بەرەڤ دامەزراوەیەکا کاراتر، شەفافتر و وەڵامدەرتر بۆ پێداویستییێن هاوڵاتییان.

گرنگیا کارنامەیا مەسرور بارزانی ژی د ڤێرەدا دیار دبیت کو پێشخستن ب دانانا پڕۆژەیان ناهێتە پیڤانەکرن، بەلکو ب توانایا بەردەوامکرنا وان، تمامکرنا پڕۆژەیێن دەستپێکری و گۆڕینا بڕیاران ب ئەنجامێن بەرچاڤ دهێتە هەڵسەنگاندن، ژ نموونەیێن دەستکەفتێن کابینا نەهێ سەرەرایی فشارێن سیاسی و ئابووری:

- د بوارێ شەفافیەت و چاکسازییا کارگێڕیێدا، ئێک ژ نموونەیێن هاتینە نیشاندان، پەیوەندی ب ڕێکخستنا دۆسیەیا مووچەیێن فەرمانبەران و لابرنا مووچەیێن نایاسایی هەیە. لابرنا نێزیکی (4600) مووچەیێن نایاسایی و ڕێکخستنا دۆسیەیا مووچەیێن فەرمانبەران هاتییە کرن. ئەڤ نموونەیە، پشتڕاستکرنا ئامار و دەرئەنجامێن وێ، گرنگیا چاڤدێری، شەفافیەت و پاراستنا سامانێ گشتی نیشان ددەت. چونکی چاکسازییا ڕاستەقینە ئەوە کو مافێ فەرمانبەرێ کارکەر بپارێزیت و ل هەمان دەمدا ڕێکخستنا دارایی و کارگێڕیێ بهێز بکەت.

- د بوارێ ئاڤ و پاراستنا سامانا سروشتی دا، ئۆمبارکرنا زێدەتر ژ (250) ملیۆن مەترێن سێجا ئاڤێ هاتییە کرن. ئەڤ پێنگاڤە، د چوارچووڤێ پاراستنا سامانێ ئاڤێ و بڕێڤەبرنا سەرچاوەیێن سروشتی دا، بابەتەکێ ستراتیژییە، ب تایبەتی دەمێ کوردستان ڕووبەڕووی گۆڕانکاریێن کەشوهەوا، کێمبوونا بارانێ و پێداویستییێن زێدەتر بۆ ئاڤێ دبییت. پاراستنا ئاڤێ نە بتنێ بۆ ئەڤرۆیە بەلکو وەبەرهێنانە بۆ مافێ نفشێن داهاتی.

- د بوارێ کەرتێ وەبەرهێنانێ دا: کەرتێ گەشتیاری و ئاکنجیبوونێ ب کوژمێ پتر ژ 16 ملیار دولاران پیشەنگە.

- دیجاتلکرنا سیستەمێ دارایی، زێدەتری ملیون وەڵاتی و فەرمانبەر بونە خودانێ هەژماری من.

- بو کێمکرنا ڕوودانان،کێشانا زێدەتری 2700 کیلومەترێن هێلێن جاددەیانو دانانا 21 هزار هێمایێن هاتن و چوونێ.

- د بوارێ رێگە و پران دا، پتر ژ چوار ترلیون دینار بو ڤەکرن و قیرکرنا ب هزاران کێلومەترێن رێک و پران ل سەرانسەری هەرێما کوردستانێ.

- پشتەڤانییا بەرهەمێ نافخو، ئاڤاکرنا چوار سایلویێن نوی و دانانا 30 هزار خانیێن پلاستیکی بو پشتەڤانیا بەرهەمێ نافخویی.

- د بوارێ چاندنێ دا ،وەبەرهێنانا چاندنێ ل کوردستانێ ژ 1.8 % گەهشتیە 12% .

ئەڤ چەند نموونەک بون، هەرچەند د بوارێن جودا دا بون، بەلێ ژ ڕووی ئامانجێ ڤە خاڵەکا هەڤبەش دگەهینن، ئەو ژی گرنگیدانا چاکسازییا دامەزراوەیی، بڕێڤەبرنا سامانێ گشتی و دروستکرنا بنەمایەکێ بەردەوام بۆ داهاتوویێیە. بۆیە، هەڵسەنگاندنا کارنامەیا حکوومەتێ پێدڤییە ب هەردوو ڕەهەندێن پڕۆژە و ئەنجامان ڤە بێت.

بێگومان، هەر پڕۆژەیەک پێدڤی ب تمامکرنێ و هەر بڕیارەک پێدڤی ب چاڤدێری و هەڵسەنگاندنێ هەیە. لێ پێویستە جوداهیێ دناڤبەرا ڕەخنەیا بنیاتنەر و هەڵمەتێن سیاسی دا بزانین. ڕەخنەیا بنیاتنەر ب پێشنیار، بەڵگە و چارەسەر دێتە پێش و ئامانجا وێ باشترکرنا کار و خزمەتا گشتییە. لێ شێواندنا ڕاستییان و پشتگوهاڤێتنا دەستکەفتان، بێی پێشکێشکرنا بەرنامەیەکی جێگرەوە، نەشێت ببیتە جێگرێ گفتوگۆیەکا سیاسی یا بەرهەمدار.

لە هەمان دەمدا، کاراکرنا پەرلەمانی کوردستانێ و بەردەوامبوونا چاڤدێریا دامەزراوەیی، پێنگاڤەکا گرنگە بۆ بهێزکرنا حکوومەتداریێ و هاوسەنگیا دەسەڵاتان. پەرلەمانێ چالاک، حکوومەتا وەڵامدەر و دامەزراوەیێن بهێز، بنەمایێن سەرەکی یێن متمانەیا گشتی و پاراستنا مافێن هاوڵاتییانن. ئەڤە دگەل پێویستیا بەردەوامکرنا چاکسازییان، دشێت ژینگەهەکا باشتر بۆ پێشکەفتن و گەشەپێدانێ دروست بکەت.

هێزا پارتی دیموکراتی کوردستان د مێژوویا خەباتێ و توانایا خۆنووکرنێ دایە، هەروەسا هێزا حکوومەتێ د توانایا بەردەوامکرنا پڕۆژەیان، چارەسەرکرنا کێشەیان و دروستکرنا متمانەیەکا بەردەوام دناڤبەرا هاوڵاتی و دامەزراوەیان دایە. ئەڤ هەردوو ڕەهەندە پێکڤە پەیامەکا گرنگ دگەهینن: پاراستنا دەستکەفتێن رابردووی پێدڤی ب دیدگەهەکا نوو، کارێ دامەزراوەیی و ئیرادەیا بەردەوام دکەت.

داهاتووێ هەرێما کوردستانێ ب قەبارەیا هەڵمەت و دروشمان ناهێتە دیارکرن، بەلکو ب قەبارەیا کار، دەستکەفت و توانایا دامەزراوەیان بۆ وەڵامدانا پێداویستییێن گەل دهێتە پیڤانەکرن. مەسرور بارزانی و حکوومەت ب ئیرادەیا خو یا بەردەوام، دیدگەها نوو و کارێ دامەزراوەیی بەرەڤ پێش دچن، ل هەمان دەمدا کاراکرنا پەرلەمانێ و بهێزکرنا متمانەیا هاوڵاتییان ببنە بەشەکێ سەرەکی یا ڤی ڕێبازێ. چونکی داهاتوویەکێ پڕ هیڤی ب دروشمێن بەرز ناهێتە ئاڤاکرن، بەلکو ب کردارێن ڕاست، بڕیارێن بەرپرسیارانە و ئەنجامێن بەرچاڤ دهێتە ئاڤاکرن.

هەواڵی پەیوەندیدار