پەیمانا سەرۆک بارزانی و ئازادکرنا شنگالێ داستانەکا نەمر
د. خالیدە خەلیل
ب هەڤکەفتنا ساڵیادا ڕزگارکرنا شنگالێ، وەکی ڤێ رۆژێ، ساڵا ٢٠١٥، کو شنگال لە ژێر دەستی تیرۆرستین داعش هاتە ئازادکرن، ئەو ئازادکرنە بە سەرپەرشتییا ڕاستەوخۆیا جەنابی سەرۆک و ڕێبەرێ نەتەوی، سەرۆک بارزانی، و ب دەستێ هێزا پێشمەرگەی قارەمان، هێزا شانازی و مێرخاسیا کوردستانێ، هاتە ئەنجامدان.
ئەو ڕۆژە نە تەنێ ڕۆژەکە سەرکەفتنا سەربازی بوو، بەڵکو ڕۆژەک بوو کو خوێنا قارەمانان، فرمێسکێن دایکان، ئازار و هیڤیێن هەزاران مرۆڤێن بێتاوان تێکەڵی یەک بوون.
سۆزا جەنابێ سەرۆکی بۆ ئێزدیان ل ٢١ی کانونا ئێکێ ٢٠١٤ بوو، کو هەتا شنگال نەهێتە ئازادکرن، خەباتا پێشمەرگەی هەر بەردەوام بیت و نەزڤرنە مالێ.
پێشمەرگە ل وێ ڕێکا خەبات و قوربانییان دا، ب ئیرادەیەکا بەهێز و باوەرییەکا قایم، بەرەنگاری تیرۆر بووە و بۆ ئازادییا شنگالێ گیانێ خۆ دانا، هەتا ئابڵوقا تیرۆرستێت داعش هاتە شکاندن.
د وێ ئۆپەراسیۆنا سەخت و دژوار دا، نێزیکی (٥٠٠) پێشمەرگێت قارەمان شەهید بوون و زێدەتر ژ هەزار پێشمەرگە بریندار بوون، و ئەوان ب خوێنا خۆ نیشان دا کو پاراستنا خاک و مرۆڤایەتی بەرپرسیاریەتەکە نیشتمانی و مرۆڤایەتییە.
شنگال، ئەو باژێرێ د مێژوویێ دا گەلەک قوربانی دایە، هێشتا ژ برینێن قوول ساڕێژ نەبوویە، چونکی پشتی ئازادکرنا وێ، ڕووبەڕووی زۆر ئاستەنگ و ئالنگاریێن سیاسی و ئەمنی بوو، ب تایبەتی ژبەر هاتنا هێز و لایەنێن ئەمنیێن جیاواز و نەخواز بۆ ناڤچەیێ، ئەڤە ژی کاریگەرییەکا مەزن ل سەر ئارامی و سەقامگیرییا وێ هەبوو.
بەلێ، سەرەڕای هەموو ڤان ئالنگارییان، شنگال هەر وەک هەمیشە نیشانا خۆڕاگرییێ و سیمبولا ئاشتیخوازی و پێکڤەژیانێیە.
شنگال ئەڤرۆ پێویستی ب زێدەکرنا هێزێن بیانی و ناکۆکیێ نینە، بەڵکو پێویستی ب ئاسایشەکا جێگیر، یا ل سەر ئیرادەیا خەڵکێ وێ، گەڕاندنا ئاوارەیان، ئاڤاکرنا وێرانبوویان، قەرەبووکرنا زیانلێکەفتییان و دابینکرنا ژیانەکا ئازاد بۆ هەموو پێکهاتەیێن وێ هەیە.
شنگال یا ئاشتی و پێکڤەژیانێیە، نە مەیدانا ناکۆکی و ململاێیێیە. وەک چاوا ڕۆژەکێ ب خوێن و قوربانییان هاتە ئازادکرن، ب سەرپەرشتییا جەنابێ سەرۆک بارزانی، ئەڤرۆ ژی پێویستە ب هەوڵ و ئیرادەیەکا هاوبەش شنگال بۆ خەڵکێ شنگالێ بگەڕێتەڤە، ئەو خەڵکێ شنگالا خۆڕاگر و خودان هەڵوێست، کو د ڕۆژێن سەخت و دژوار دا کوردستانیا شنگالێ پاراستیە، دا داهاتوویەکا ئارام و پڕ هیڤی بۆ نەوەیێن داهاتی دروست بکەن.
هەزاران سلاڤ بۆ گیانێ پاکێ شەهیدان، سلاڤ بۆ خێزانێن قوربانیێن شنگالێ، و سلاڤ و ڕێز بۆ هەموو پێشمەرگەیێن قارەمان، کو بوونە قەڵغانێ پاراستنا خاک، نیشتمان و کەرامەتا مرۆڤایەتیێ.
