"مەسرور بارزانی ل بەهدینان"سەرەدانەکا جودا و پەیامەکا راستەوخو بو خەلکێ
د. شیرین حوسنی
سەردانا سەرۆک وەزیرێن حکومەتا هەرێما کوردستانێ، کاک مەسرور بارزانی، بو پارێزگەها دهوکێ و ئیدارا سەربەخویا زاخو ، جودا تر ژ جاران، ئەڤ سەردانە نە تنێ بۆ چاڤپێکەفتن و کۆمبوونان بوو، بەلكو دەرفەتەک بوو بۆ گوهداریا دەنگێ خەلكێ، هەلسەنگاندنا پێدڤیێن دەڤەرێ و پشتڕاستکرنا وێ پەیامێ یە کو خزمەتکرنا هاوڵاتییان پێویستی ب بەردەوامی و بەرپرسیارەتیێ یە.
ل دەسپێکا سەرەدانا خودا وەک جێگرێ پارتی دیموکراتی کوردستان سەرەدانا مەکتەبا رێکخستنا پارێزگەها دهوک و ئیدارا سەربەخویا زاخو کر ،د گەل بەرپرسێن حزبی یێ دەڤەرێ کومبوو، پەیاما وان تەکەز ل سەر پالپشتیا حکومەتێ کر و و دیسان دەرگەهێن حزبێ دڤێت ڤەکریبن و گوهداریا خەلکێ بکەن و دناف خەلکێ دا بن.
ل ڕۆژا ٢٤ی تشرینا ئێکێ، سەرۆک وەزیران ل دهوکێ ل گەل رێڤەبەرێن ئیداری یێن پارێزگەها دهوکێ و ئیدارەیا سەربەخۆیا زاخو کۆمبوو. دڤێ کومبوونێ دا، دۆخێ خزمەتگوزاریێن گشتی و چەوانیا باشترکرنا خزمەتگوزارییان بو خەلكێ بادینان هاتنە باسکرن. ئەڤە پەیامەکە کو کارگێریا حکومەتێ پێدڤییە هەردەم ل گەل پێدڤیێن خەلكێ بیت، و هەردەم هەول بدەت بۆ چارەسەرکرنا کێشەیێن ڕۆژانە یێن هاوڵاتییان.
خزمەتگوزاریێن گشتی، وەک ڕێگا، ئاڤ، کارەبا، تەندروستی، پەروەردە و پاکژییا باژێر و گوندان، بنەمایێ پەیوەندیا خەلكێ و حکومەتێ پێک دئینن. هەرچەند پڕۆژە و کارێن گەشەپێدانێ هەبن، بهایێ وان د هندێ دایە کا چەند ژیانا خەلكێ ساناهی تر دکەن و چەند پێدڤیێن وان د هەمی دەڤەران دا دئینە جێبەجێ کرن. د ڤی چوارچۆڤەیێ دا، پەیاما سەرۆک وەزیران بو رێڤەبەرێن ئیداری، بۆ ئەنجامدانا بەرپرسیاریێن وان و هەولدان بۆ خزمەتکرنا خەلكێ، گرنگییا ڕاستەقینەیا سەرەدانێ دیار دکەت.
د هەمان روژدا پەیاما سەروک وەزیران بو مەدیاکاران، دووپاتی ل میدیایەکا پروفشنال و بابەتیانە، میدیا وەک ئامرازەک بکەڤیتە د خزمەتا بەرژەوەندیا گشتی و بلندکرنا ئاستێ هوشیاریا نیشتیمانی و نەتەوەیی و پاراستنا کلتور و بەها و تایبەتمەندیێن کوردستانێ، ببنە فاکتەرێ سەقامگیریا جڤاکی و ئاڤاکرنا تاکەکێ هوشیار و نیشتیمانپەروەر و جڤاکەکێ ساخلەم، ببنە دەنگێ راستیێ و دەنگ و باس و زانیارییان ب شێوەیەکێ بابەتیانە بەڵاڤبکەن. دوورکەڤن ژ پێلا پوپولیستی و هەست ب بەرپرسیارەتیا جڤاکی و مەدیایی بکەن.
ل ڕۆژا ٢٥ی تشرینا ئێکێ، سەرەدان بەردەوام بوو ب چاڤپێکەفتن و ڤەکرنا پڕۆژەیێن گەشەپێدانێ ل ئیدارا سەربەخویا زاخو و دەڤەرێن دەوروبەر. ڤەکرنا پڕۆژەیێن ڕێگا و پشتگیریکرنا گەشەیا ئابووری، وێ پەیامێ دگەهینن کو گەشەپێدانێ پێویستی ب پلان، بەردەوامی و هاریکاریا حکومەت، کەرتێ تایبەت و خەلكێ هەیە. ئەڤ پڕۆژەیە دشێن ببنە پێنگاڤێن گرنگ بۆ باشترکرنا هاتن و چوونێ، ساناهیکرنا گەشت و گوزار و دروستکرنا دەرفەتێن کارێ ژ بۆ گەنجان.
دیسان ل زاخو پێشوازی ل شاندێ عێراقا فیدرال کر، د کومبوونێ دا داکوکی ل سەر ماف و ئیستیحقاقێن هەرێما کوردستانێ و تاکێ کوردستانێ کر، پەیامەکا رون و ئاشکرا ژ زاخو گەهاندە وان کو سەرەرایی گڤاشتنێن هەوە ل سەر هەرێما کوردستانێ و خەلکێ کوردستانێ ئەم مژیلی ئاڤەدانی و گەشەکرنا هەرێما خو نە و زاخو وەک نموونە، نە تەسلیم دبین و نە بێ دەنگ دبین ل سەر مافێ خەلکێ خو.
ل ڕۆژا ٢٦ی تشرینا ئێکێ، سەرۆک وەزیران ل گەل تەخ و چینێن جودا کومبوو، خەلکێ ئاخفت و جەنابێ وان گوهێ خودایێ ، ئێک ژ خالێن پوزەتیڤێن سەروک وەزیرانە " گوهـ گرەکی باشە " ، ل دوماهیێ ئێک ئێک بەرسڤ دان، ئاماژە دا بەرپرس خزمەتکارە هەردەمێ پلا بەرپرسیارەتیێ وەردگریت ژ خەلکێ کێمتر لێ دهێت نەک بلندتر دبیت، سوز دا ئەوا دشیانێن حکومەتا هەرێمێ دا هەبیت دێ ئێتە چارەسەر کرن. دیسان د گەل کەرتێ تایبەت کومبوو و گرنگییا ڕۆلێ کەرتێ تایبەت د گەشەپێدانا ئابووری و دروستکرنا دەرفەتێن کاری دا دیار کر. ڤەکرنا دەرفەتێن وەبەرهێنانێ و پشتگیرییا کەرتێ تایبەت، دشێن ببنە ئەگەرێ گەشەیا بازارێ کاری و بهێزکرنا ئابوورییا دەڤەرێ. پالپشتیا حکومەتێ دا دیارکرن وگوتە ئیدارا دەڤەرێ هەمی ئاسانکاریا بکەن، ژ بو هندێ دەرفەتێن ئابووری بگهنە خەلكێ و ببنە بەرهەمێ ڕاستەقینە د ژیانا وان دا.
گرنگیا ڤی سەردانێ بتنێ د ڤەکرنا پڕۆژەیان و کومبوونان دا نینە، بەلكو د ئەو پەیامەدایە کو سەرۆک وەزیران پێدڤییە ل نێزیکی خەلكێ بیت، پێدڤیێن وان ببینیت و بەرپرسیارێن دەڤەرێ ب هەماهەنگی و بەرپرسیارێتی ڕابگریت. هەروەسا، سەردان دشێن ببنە دەرفەتەک بۆ هەڵسەنگاندنا کارێ رێڤەبەریێ و دیارکرنا وان خاڵێن کو پێدڤی ب چاکسازی و هەولێن زیاتر هەنە.
بۆ پارێزگەها دهوک و ئیدارا سەربەخویا زاخو ، ئەڤ سەردانە پەیامەکە کو گەشەپێدان و خزمەتگوزاری پێویستی ب ڕێکخستن، بەردەوامی و دابەشکرنا دادپەروەرانەیا دەرفەتان هەیە. خەلكێ هەر دەڤەرەکێ مافێ وی هەیە خزمەتگوزاریێن باش و دەرفەتێن گەشەیێ ببینیت، و ئەو بەرپرسیارەتیە ل سەر ملێ هەمی سازی و رێڤەبەریێن میرییە.
