د. رێبوار: ھیچ مەترسییەك لەسەر ھاووڵاتیان و دیپلۆماتكارانی ئەمەریكا لە ھەرێم نییە

 

هەولێر-KDP.info- بڕیاری ئەمەریكا بۆ راگرتنی ڤیزا و مەشق و راھێنان بە ھێزەكانی پێشمەرگە، پەرلەمانی كوردستانی ھێناوەتە دەنگ و سەرۆكی لیژنەی پەیوەندییەكانیش دەڵێ، ھیچ مەترسییەك بۆ سەر ھاووڵاتیان و دیپلۆماتكارانی ئەمەریكا لە ھەرێمی كوردستان نییە. 

 

دكتۆر رێبوار بابكەیی، سەرۆكی لیژنەی پەیوەندییەكان لە پەرلەمانی كوردستان، بە ماڵپەڕی فەرمیی پارتی دیموكراتی كوردستانی راگەیاند: "راستە ناوچەكە بە ھۆی گرژییەكانی نێوان ئەمەریكا و ئێرانەوە ئاڵۆزی بە خۆیەوە بینیوە، بەڵام ھیچ مەترسییەك بۆ سەر ھاووڵاتیان و دیپلۆماتكارانی ئەمەریكا لە ھەرێمی كوردستان نییە و رەوشی ئەمنی زۆر سەقامگیرە".

 

سەرۆكی لیژنەی پەیوەندییەكان لە پەرلەمانی كوردستان دەڵَێت: "ئێمە دڵگرانین بەو دوو بڕیارەی ئەمەریكا بۆ راگرتنی ڤیزا بە ھاووڵاتیانی خۆی بۆ عێراق و ھەرێمی كوردستان، ھەروەھا راگرتنی مەشق و راھێنانەكانیان بە ھێزەكانی پێشمەرگە، چونكە رەوشی ھەرێمی كوردستان زۆر جیاوازە لە ناوچەكانی دیكەی عێراق و پێویستە ئەمەریكا ئەوە لە بەرچاو بگرێت".

بابكەیی ئاماژەی بۆ ئەوەش كرد: "داوا لە ئەمەریكا دەكەین بە بڕیارەكانی خۆیدا بچێتەوە و پێشبینی دەكەین ئەو بڕیارەی دەربارەی عێراق دەریكردووە، ھەرێمی كوردستان وەدەر بێنێ، لەبەر ئەوەی ئێمە ھەموومان دەزانین ھیچ ھێزێك نییە لە ھەرێمی كوردستان مەشق و راھێنان لەلایەن ئەمەریكا و ھاوپەیمانانەوە ببینێ و ئینتیمای بۆ وڵاتانی ناوچەكە ھەبێت".

 

دەشڵێ: "پەیامی خۆمان بە ئەمەریكا و ھاوپەیمانان دەگەیەنین و دڵنیایان دەكەینەوە لەوەی ژیانیان لە ھەرێمی كوردستان پارێزراو دەبێت و پێویستە ئەوانیش ئەو سەقامگیرییەی ھەرێمی كوردستانیان لە بەرچاو بێت".

 

 قائید میرۆ