قۆناغی دووەمی پێدانی ١٠٠ ملیۆن دۆلاری بەڵێندەران بەردەوامە

هەولێر-KDP.info-  سەرۆكی یەكێتیی بەڵێندەران باس لەوە دەكات كە لەگەڵ باشبوونی دۆخی داراییی حكوومەت داواكارن بڕێك پارە بۆ ئەو پرۆژانە تەرخان بكرێت كە زەروورن و دەبێ بچنە بواری جێبەجێكردنەوە. دەشڵێت، ئەگەری زۆرە ئەمساڵ سەرجەم قەرزی بەڵێندەران بدرێتەوە.

د. سەرۆ دزەیی, بۆ ماڵپەڕی فەرمیی پارتی دیموکراتی کوردستان گوتی: "هیوادارین لە لایەن حكوومەتەوە بڕێك پارە دیاری بكرێت بۆ ئەو پرۆژانەی ئەولەویەتیان هەیە، بۆ ئەوەی تەواو بكرێن، ئەگەر هەموو پرۆژەكانیش نەبێت، بەشێكیان گرنگن و لەگەڵ بەردەوامیی پێدانی پارەی بەڵێندەران پرۆژەكان دەستبەكار دەبنەوە. ئێستا بە خۆشحاڵییەوە لە قۆناغی دووەمدا بڕی ١٠٠ ملیۆن دۆلار دراوەتەوە بە بەڵێندەران و ئێستا لە قۆناغی دابەشكردنداین و ٨٠٠ ملیۆنی دیكە ماوە كە وەك قەرز، پارەی بەڵێندەران لای حكوومەتە."

دزەیی گوتیشی: "ئەگەری زۆرە ئەمساڵ سەرجەم پارەی بەڵێندەران بدرێتەوە، ئەوكاتە پرۆژەی گرنگی وەك ڕێگاوبان و خزمەتگوزاریی گشتی باشتر دەبێت."

كارزان سەباح