جه‌ماوه‌رێ دهوکێ به‌رده‌وامیدان ب رێبازا بارزانیێ نەمر ده‌ست ب سه‌رهلدانێ کر
دهۆك-KDP.info- 116ساڵیا ژ دایکبوونا بابێ روحى یێ نه‌ته‌وه‌یێ کورد (مسته‌فا بارزانى) و رۆژا سه‌رهلدانا دهۆکا خۆڕاگر ل 14/3/1991ێ، ب چاندنا دارا ل جادا بارزان و ب گێرانا ئاهەنگا و فلمەکێ دیکۆمنتارى لسەر باژێرێ دهۆکێ دئێتە ساخکرن.
14ى ئادارا 1991ێ، جەماوەرێ دەڤەرا دهۆکێ سەرهلدان دژى رژێما بەعس یا ژناڤچوویى ل عیراقێ کر و پێشمەرگێ کوردستانێ هاتنە دناڤەندا باژێرێ دهۆکێ دا، کۆ ئەڤ بیرەوەریە دکەڤیتە دهەمان رۆژا ژدایکبوونا بابێ روحى یێ نەتەوا کورد (مەلا مستەفایێ بارزانى)یێ نەمر، ژبۆ ڤێ ئێکێ لقى ئێکێ پارتى دیموکراتى کوردستانێ بەیاننامەک بەلاڤ کر و تیدا نڤیسیە:" ل یادا (116) سالیا ژ دایکبوونا بابێ روحى یێ نه‌ته‌وه‌یا کورد (مسته‌فا بارزانى) و رۆژا سه‌رهلدانا دهوکا خوڕاگر ل 14/3/1991ێ، لقێ ئێک یێ پارتى دیموکراتى کوردستان گه‌رمترین پیروزباهیان ئاراسته‌یى ته‌ڤایا خه‌لکێ کوردستانێ و جه‌ماوه‌رێ باژێرێ دهوکێ و مالباتێن شه‌هیدێن سه‌ربه‌رز و پێشمه‌رگێن قاره‌مان دکه‌ین، کۆ مسته‌فا بارزانی ل بارزان د ناڤ خانه‌واده‌یه‌کا نه‌ته‌وه پارێز و کوردپه‌روه‌ر ده‌ست ب شوره‌ش و به‌رخودانێ کریه ژ پێخه‌مه‌ت رزگارکرنا گه‌ل و ئاخا کوردستانێ، و ب درێژیا ژیانا خو رێبه‌رایه‌تى و سه‌رکردایه‌تیا شوره‌ش و بزاڤا رزگاریخوازیا کوردستانێ کریه. ساخکرنا روژا ژ دایکبوونا سیمبولێ نه‌ته‌وه‌یى به‌رده‌وامیدانه ب رێبازا وى یا پیروز کو رێبازا ئاشتیخوازى و دیموکراسی و خه‌باتا ره‌وایا پێشمه‌رگایه‌تی بوو ژبۆ سه‌ربه‌خوییێ و ل سه‌ر ده‌ستێ بارزانیێ نه‌مر رێیا ئازادیێ بو گه‌لێ مه هاته دانان و فێرکرین نابیت کێمتر ژ ئازادى و رزگاریێ رازى ببین".
دهەمان بەیاننامەدا ئاماژە دایە:"جه‌ماوه‌رێ دلسوزێ دهوکا خوراگر ل رۆژا ژ دایکبوونا بارزانیێ نه‌مر وه‌ک وه‌فادارى و به‌رده‌وامیدان ب رێبازا بارزانى ده‌ست ب سه‌رهلدانێ کر و باژێرێ دهوکێ ژ دیکتاتور و زورداریێن رژێما به‌عسا شوفینست رزگارکرن و قۆناغه‌کا نوى یا ئازادیێ بۆ خه‌لکێ ده‌ڤه‌را دهوکێ هاته پێش، ئه‌ڤه‌ژى ژ ئه‌نجامێ کوردپه‌روه‌رى و فیداکاریا خه‌لکێ سه‌ربه‌رزێ دهوکێ بوویه هه‌مبه‌ر ئارمانجێن نه‌ته‌وه‌یى و رێبازا بارزانیێ باب".
ئیسماعیل مستەفا، ئاخفتنکەرێ لیژنا ساخکرنا بیرەوەریێن ئادار و نەورۆزێ بۆ ماڵپەرێ فەرمیێ پارتى دیموکراتى کوردستان گۆت:" ب هەلکەفتا ڤان هەر دوو بیرەوەریێن پیرۆز ئەو جهێن خەلکێ دەڤەرێ دچنێ بۆ سەیرانێ بگرە ژ گەلیێ کورتکى و چیایێ زاوا و گەلیێ دهۆکێ تا گۆندێ قارقارەڤا دێ ئێنە پاقژکرن".
ئیسماعیل مستەفا خۆیاکر:" ل ئەڤرۆ دێ ژمارەیەکا دران ل جادەیا بارزان ل دهۆکێ ئێنە چاندن و هەوەکا بەرفرەه بۆ راکرنا تایرێن تورمبێلا ئێتە ئەنجامدان داکۆ ل چەژنا نەورۆزێ تایرە ژلایێ خەلکێ ڤە نەئێنە سوتن و ژینگەها دەڤەرێ نەئێتە تێکدان".
ئەڤرۆ 14ى ئادارا 2019ێ ل هۆلا کۆنگران باژێرێ دهوکێ دێ فلمەکێ دیکیومنتارى لسەر باژێرێ دهۆکێ و سەرهلدانا وێ ئێتە نمایشکرن و چەندین هوزان ئێنە خواندن و دویڤدا دێ بیتە ئاهەنگا جەماوەرى وەك ئاخفتنکەرێ لێژنا ساخکرنا بیرەوەریێن ئادار و نەورۆزێ بەحسكرى.
هەلز عەلى سەلیم
