ل ھەرێما کوردستانێ 14% ژ ژنان کار دکەن
دهۆک -KDP.info- سەره‌ڕایى گرنگیدانا حکومەتا هەرێما کوردستانێ ب کارکرنا ژنان، بەلێ ل سەرانسەرێ ھەرێمێ 14% ژ ژنان بەرامبەری 86% یا زەلامان کار دکەن، ژبەر هندێ ژن دخوازن رێژەیا کارکرنا وان دکەرتێ حوکمەتێ و تایبەتدا بھێتە بلندکرن و ژن ژی ببیتە خودان ئابوورەکێ سەربەخۆ.
پشتى حکومەتا هەرێما کوردستانێ کوردستانێ گرنگى دایە رۆلێ ژنان دکاریدا و ب تایبەت دناڤ کارۆبارێن حکومەتێدا، ئەڤرۆ ژن پێدڤیە بەرەڤ کارێ تایبەت ڤە ژى بێت، بۆ ڤێ ئێکى سێوە فاتح، سەرۆکا رێکخراوا لێدەر و چاڵاکڤانا ژنان بۆ مالپەرێ فەرمیێ پارتى دیموکراتى کوردستان گۆت:"ب گۆڕەی ئامارێن وەزارەتا کار و کاروبارێن جڤاکی یا حوکمەتا ھەرێما کوردستانێ 14% ژ ژنان کارى ژ دەرڤەی خیرانێ دکەن, ژ وێ رێژەیێ بەهرا پتر ئەون یێن دکەرتێ حوکمەتێ و بشێوەکێ بەرچاڤ کەرتێ تایبەت ژلایێ ژنان ڤە هاتیە پشتگوھـ ھاڤێتن.
سەرۆکا رێکخراوا لێدەر خویاکر:" ژن و زەلام دیەکسانن دماف و ئەرکێن خودا و چ جوداھی د ناڤبەرا ژن و زەلاماندا بۆ هەر کارەکى نینە و کارکرنا ژنێ دکەرتێ حکومەت و تایبەتدا پێدڤیەکە بۆ ئاڤاکرنا جڤاکەکێ ساخلەم و شارستانى، ژبەر ڤێ ئێکێ گرنگە زێدەتر گرنگى ب کارێ ژنێ بھێتە دان ھەر چ نەبیت دڤێت رێژە بۆ نێزیکێ 50% بھێتە زێدەکرن".
سێوە فەتاح بەحسکر، کو کارکرنا ژنان د کاریدا نه بتنێ ژ بۆ دەستڤەئینانا داھاتەکێ یه, بەلکو بۆ سەلماندنا ھەبوونا خویە، کو شیان ھەنە مینا زەلامی کار بکەت بۆ خزمەتا خێزان و جڤاکێ خوە.
هەر بۆ ڤێ مەرەمێ جیان مەهدى، چالاکڤان دبوارێ ژنان دا بۆ مالپەرێ فەرمیێ پارتى دیموکراتى کوردستان خۆیاکر:" راستە ژنێ رۆلەکێ بەرچاڤ د پەرلەمانى و تا رادەیه‌کێ دحکومەتێدا هەیە، بەلێ گرنگە پتر گرنکى ب کارێ ژنێ بهێتەدان و بەرەڤ کارکرنا کەرتێ تایبەت بچیت و ب تایبەت پشتى قەیرانا دارایى یا ب سەر هەرێما کوردستانێ دا هاتى، گرنگە مێشکێ کارکرنێ و رەوشەنبیریەتا وێ لدەڤ ژنێ زال ببیت و دخوازم رێژەیا کارکرنا ژنان پتر لێ بهێت ژبۆ بار سڤکرنا ژیارا وێ، داکۆ ئابووریەکا سەربەخۆ هەبیت".
هەلز عەلى سەلیم
