فەرسەت مەرعى: هەر جهێ حەشدا شەعبى بگەهتێ دێ وێران بیت

 

زاخۆ  -KDP.info-مامۆستایەکێ زانکۆیا زاخۆ راگەهاند، حەشدا شەعبى گرێدایى مەرجعەیتێ یە نەک دەولەتێ، هەر جهێ ئەڤ هێزە بگەهتێ دێ دەست ب وێرانکرنا وێ دەڤەرێ کەت، لێ خوراگرى هێزا پێشمەرگەیى و سیاسەتا سەرکردایەتیا سیاسى یا بهێز ل هەرێما کوردستانێ، ناهێلیت ئەو نیزیکى سنورێن هێلا 36 ببن.

پشتى سوپایێ عیراقێ 10 هەیڤا 6 سالا 2014ێ، بەرامبەر تیرۆرستێن داعشێ شکەستین و باژێرێ مووسل رادەستى وان کرى بیێ بەرگیرکرن، حکومەتا عیراقێ حەشدا شەعبى دامەزراند، (پ.د. فەرسەت مەرعى) مامۆستایێ زانکۆیا زاخۆ، بۆ مالپەرێ فەرمیێ پارتى دیموکراتى کوردستان گۆت: "سەرۆک وەزیرێ عیراقێ یێ بەرێ (نورى ئەلمالکى)، عیراق فرۆت بوو پەرژەوەندیێن شیعەیان و مووسل رادەستى تیرۆرستێن داعشێ کر، داکو شەرێ کوردان بکەن، لێ سەرکردایەتیا سیاسى ل کوردستانێ ب هێمنى سەرەدەرى دگەل وان کر، ژبەر ڤێ ئێکێ شیعە بخۆ ژى دڤى ئاگریدا کەلین".

(پ. د. فەرسەت مەرعى) خویاکر: "پشتى شیعەیان شکەستن دیتى، (نورى ئەلمالکى) هێزەکا تائیفى یا توندرەو ب ناڤێ (حەشدا شەعبى) ب هاریکاریا ئیرانێ دروستکر ژبۆ دەڤەرێن خۆ ژ داعشێ پارێزیت، دهەمان دەمدا ئەڤ هێزە گرێدایى مەرجعەیتێ یە نەک دەولەتێ، هەر جهێ ئەڤ هێزە بگەهتێ دێ دەست ب وێرانکرنا وێ دەڤەرێ کەت".

(فەرسەت مەرعى)، بەحسکر: "حەشدا شەعبى گرۆپێن پرت و بەلاڤن و دئێکگرتى نینن، هەر دەمێ ئێک ژوان گرۆپا کارێن خراب ئەنجامدان دێ بێژن ئەو نە ژ حەشدا شەعبى نە، لێ خوراگرى و هێزا پێشمەرگەیى و سیاسەتا سەرکردایەتیا سیاسى یا بهێز ل هەرێما کوردستانێ، ناهێلیت ئەو نیزیکى سنورێن هێلا 36 ببن و خەلکێ کوردستانێ دێ ژ وان پلانا ژى رزگار بیت".

هەلز عەلى سەلیم