کوردستان تەسلیمی ھەڕەشەکانی عێراق نابێت

ھەولێر-KDP.info- چاودێرێکی سیاسی دەڵێت، ھێزی پێشمەرگە بە خوێن ناوچە کوردستانییەکانی دەرەوەی ئیدارەی ھەرێمی لە دەستی داعش ڕزگار کردووە، بۆیە ئاسان نییە حەشدی شەعبی و ھێزە عێراقییەکان وەکو گەشتکردن بێنەوە بۆ ئەو ناوچانە.

حکوومەتی عێراق لە ڕێگەی ھێزە عێراقییەکان و حەشدی شەعبییەوە ماوەی چەند ڕۆژێکە ھەڕەشە لە ھەرێمی کوردستان دەکات و دەڵێت، پێویستە ھێزی پێشمەرگە ئەو ناوچانە چۆڵ بکات، کە لە دەستی داعش ڕزگاری کردوون و ھێزی پێشمەرگە و سەرکردایەتیی کوردیش بە ھەموو شێوەیەک ئەمە ڕەت دەکەنەوە.

لەم بارەیەوە (ئازاد ئەبووبەکر)، چاودێری سیاسی بە ماڵپەڕی فەرمیی پارتی دیموکراتی کوردستانی ڕاگەیاند: ''ھێزی پێشمەرگە ناوچە کوردستانییەکانی دەرەوەی ئیدارەی ھەرێمی کوردستانی بە خوێنی خۆی لە دەستی تیرۆریستانی داعش ڕزگار کردووە و ئێستاش پارێزگاری لەو ناوچانە دەکات، بۆیە ئاسان نییە حەشدی شەعبی و ھێزە عێراقییەکان وەکو گەشتکردنێک بێن و جارێکی دیکە بگەڕێنەوە بۆ ئەو ناوچانە، بۆیە ئێستا وەک جاران نییە و کوردستان خاوەن ئیرادە و ھێزی پێشمەرگەیە و ڕیفراندۆمیشی ئەنجام داوە و بە ئاسانی تەسلیمی ھەڕرەشەکانی عێراق نابێت.''

بە گوتەی یاساناسان بەغدا زیاتر لە ٥٥ ماددەی دەستووری پێشێل کردووە، کە زۆرینەیان لە بەرامبەر ھەرێمی کوردستاندا بووە، لەو بارەیەوە (ئازاد ئەبووبەکر) گوتی: ''زۆر سەیرە، بەغدا کە خۆی دەستوور پێشێل دەکات و ئێمەش وەکو ھەرێمی کوردستان دەستوور جێبەجێ دەکەین، کەچی بە ئێمە بڵێن ئێوە دەستوور پێشێل دەکەن. کاری سوپا سەر سنوورەکانە، کەچی بێنن بۆ ناو شارەکان و ھەڕەشە لە خەڵکی ناوچە کوردستانییەکان بکەن.''

ھەرێمی کوردستان ئامادەییی خۆی بۆ گفتوگۆ و دانوستان لەگەڵ بەغدا دەربڕی، بەڵام بەغدا گفتوگۆ ڕەت دەکاتەوە. (ئەبوبەکر) ڕوونی کردەوە: ''ئەو کێشانە تازە نین و کۆنن، بۆیە پێویستە کێشەکان لە ڕێگەی گفتوگۆوە چارەسەر بکرێن، نەک بە ھەڕەشەکردن، بۆیە ئەوان ناتوانن بەزۆر ئەو ناوچانە بگەڕێننەوە بۆ ژێر دەستی خۆیان و، باشترین کار ئەوەیە گفتوگۆ بکەن و بگەڕێنەوە بۆ دەستووری عێراق، چونکە ڕیفراندۆم کراوە و ئیدی پاشگەزبوونەوە نییە، بۆیە پێویستە بەغدا دەستبەرداری ئەو مەرجە بێت و ملکەچی ئەوە بێت کە گفتوگۆ دەست پێ بکرێت.''

فەرماندەی ھێزی پێشمەرگە لە سنووری دەشتی نەینەوا، (سەید ھەژار) بە ماڵپەڕی فەرمیی پارتی دیموکراتی کوردستانی ڕاگەیاند: ''لای ئێمە دۆخەکە ئارامە و حەشدی شەعبی لە بەرامبەری ئێمە ھەندێک خێمەیان ھەڵداوە و ھێزی پێشمەرگەش لەوپەڕی ئامادەباشیدایە بۆ ھەر ئەگەرێکی نەخوازراو، چونکە ئەو خاکەی ئێستا ئێمەی لەسەر دەژین، پێویستە بەرگری لێ بکەین، چونکە خودا ئەمەی بە ئێمە بەخشیوە، نەک عێراق و وڵاتانی دیکە، بۆیە ئێمە تازە بڕیارمان لە چارەنووسی خۆمان داوە و ناتوانین جارێکی دیکە لە ژێر دەستی عێراقدا بین و ڕێگەش نادەین یەک بستی خاکی ئێمە داگیر بکرێت.''

(سەید ھەژار) گوتیشی: ''ئێمە شەڕمان ناوێت و داوای ئاشتی دەکەین، بەڵام ئەوەی شەڕ بە ئێمە بفرۆشێت، ئێمەش بەرگری لە خۆمان دەکەین و پەشیمانیان دەکەینەوە، بۆیە پێویستە چاو لە ڕژێمی پێشوو بکەن،  کە زوڵمی کرد، چارەنووسی چۆن بوو، چارەنووسی ئەمانە لە ئەوان خراپتری لێ دێت، بۆیە پێویستە ئاگاداری خۆیان بن.''

بڵند ئیبراھیم