ل ئامێدیێ 835 خوبەخش دبەرهەڤن بەرەڤانیێ ژ کەرکوکێ بکەن
ئامێدیێ-KDP.info- محەمەد محسن ئامێدى، پێشمەرگەیێ دێرین و کەسایەتیا بەرنیاس ل دەڤەرا ئامیدیێ راگەهاند، خەلکێ مە بۆ بەرڤانیکرن ژئاخا کەرکوکێ ناڤێن خۆ وەک خوبەخش تومار دکەن، کۆ هەر دەمێ حشدا شەعبى و سوپایێ عیراقێ هێرشێ بکەتە سەر ئاخا کەرکوکێ بێ دوودلى بجێن بەرەڤانیێ ژ دل و قودسا کوردستانێ بکەن.
پشتى راگەهاندنا ئەنجامێن سەرکەفتنا ریفراندۆما سەربەخۆیا کوردستانێ، حکومەتا عیراقێ پەنا بۆ سزادانا هەرێما کوردستانێ برن، بۆ ماوەیێ چەند رۆژانە جەکدارێن حەشدا شەعبى سەر ب تائیفا شیعى ڤە و سوپایێ عیراقێ ل دەردۆرێن دەڤەرا کەرکوکێ کومڤە بووین، ژبۆ شەرى دژى پێشمەرگەیێ کوردستانێ بکەن و دەڤەرێ داگیرکەن.
(محەمەد محسن ئامێدى)، پێشمەرگەیێ دێرین و کەسایەتیا بەرنیاس ل دەڤەرا ئامیدیێ بۆ مالپەرێ فەرمیێ پارتى دیموکراتى کوردستان گۆت:" خەلکێ قەزا ئامێدیێ دەستپێشخەر بووینە بۆ بەرڤانیکرنێ ژ ئاخا کوردستانێ ددەمێ تیرۆرستێن داعشێ هەولا داگیرکرنا کوردستانێ کرى، ئەڤرۆ ژى ب هەمان روحیەت خەلکێ مە بۆ کەرکوکێ ناڤێن خۆ وەک خوبەخش تومارکرینە، کۆ هەر دەمێ حشدا شەعبى و سوپایێ عیراقێ هێرشێ بکەتە سەر ئاخا کەرکوکێ بێ دوودلى بجێن بەرەڤانیێ ژ دل و قودسا کوردستانێ بکەن".
ئەڤرۆ سپێدێ دەمژمێرى 10 سپێدێ تا 4 ئێڤارى، خەلکێ قەزا ئامێدیێ (کچ و کور) و هندەک ژوان پێشمەرگەیێن دێرین و خانەشینکرینە ناڤێن خۆ وەک خۆبەخش بۆ بەرەڤانیکرنێ ژ ئاخا کەرکوکێ تومارکرینە، (محەمەد محسن)، خویاکر:" 45 کچ و 790 زەلامان تا نوکە ناڤێن خۆ تومارکرینە و هەر کەسێ حەز بکەت دشێت سوباهى ژى پشکدار ببیت، تا نوکە 835 کەسان ناڤێن بۆ بەرەڤانیکرنێ ژئاخا کەرکوکێ و هەر دەڤەرەکا کوردستانێ مەترسى لسەر هەبیت تومارکرینە، داکۆ بەرەڤانیێ ژێ بکەن".
ئەڤ هەستە چەوا پەیدا بوو؟
پێشمەرگەیێ دێرین و کەسایەتیا بەرنیاس ل دەڤەرا ئامیدیێ زەلالکر:" بابەتێ سەرکەفتنا ریفراندۆمێ هیجەتەکە دۆژمنان بخۆ گرتى، بتنێ وان دڤێت کەرکۆکێ و نەفتا کوردستانێ داگیر بکەن و ناسناما کوردینیێ ل دەڤەرێ ژناڤببەن، دهەمان دەمدا دخوازین هەمى لایەنێن سیاسى دئێکگرتى بن دڤێ هاوکێشەیێ دا، دیسان دخوازین ئەو سەرکردەیێن دناڤ ئێکەتى نیشتمانى کوردستاندا، خودایە پال شیعەیان هندەک بەریخۆ بدەنە پەرژەوەندیێن بلندێن کوردستانێ، جونکى حەشدا شەعبى، داعشەکا مودرێنە و ئارمانجا وێ ژناڤبرنا کوردستانێ یە".
پێشمەرگەیێ دێرین بەحسکر:" پشتراستم ب ئێکگرتنێ دێ ئارمانجێن خوینا شەهیدان بۆ هاتیە رووشتن دێ ئێتە بجهئینان و ئەم ل هیڤیا مزگینیا دەولەتبوونێ نە".
هەلز عەلى سەلیم
