حسین قائیدى: حکومەتا عیراقێ دێ زیانێ گەهنتە نەخوشیان

دهۆک-KDP.info- حسین قائیدى، رێڤەبەرێ نڤیسینگەها رزگارکرنا رەڤەندراوێن کوردێن ئیزیدى راگەهاند، ژ جڤاکا نیڤدەولەتى دخوازین فشارەکێ بخێنە لسەر حکومەتا عیراقێ بۆ ڤەکرنا ڤرۆکخانەیێن هەرێما کوردستانێ، داکۆ بشیین نەخوشێن ژ دەستێ تیرۆرستێن داعشێ رزگار بوویێ رەوانەیى دەرڤەیى وەلاتى بکەین بۆ چارەسەرکرنێ.

پشتى سەرکەفتنا ریفراندۆما سەربەخۆیا کوردستانێ ب رێژا 92.73 بدەنگێن بەلێ، حکومەتا عیراقێ هندەک بریار دژى هەرێما کوردستانێ دەرکرن وەک هەلویستەک نەرازیبوونێ ژبۆ سەربەخۆیا کوردستانێ، د ئەنجامدا ڤرۆکخانەیێن هەر ئێک ژ (هەولێر و سلیمانى)یێ داخستن، (حسین قائیدى)، رێڤەبەرێ نڤیسینگەها رزکارکرنا رەڤەندراوێن کوردێن ئیزیدى، بۆ مالپەرێ فەرمیێ پارتى دیموکراتى کوردستان راگەهاند:"نەخوشیێن رزگار بوویى ژ دەستێ تیرۆرستێن داعشێ رەوشا وان یا سەخلەمیێ تێکچوویە و ب تایبەت زارۆک و ئافرەتان".

(حسین قائیدى)، خویاکر:" دڤێت ئەو نەخوشە ل دەرڤەیى وەلاتى بان ژبۆ چارەسەرکرنێ، لێ دائێخستنا ڤرۆکخانەیێن کوردستانێ ژلایێ حکومەتا عیراقێ ڤە مەترسى و کارتێکرن ئێخستە لسەر رەوشا ڤان نەخوشان، ژبەر ڤێ ئێکێ ئەم داخوازێ ژ جڤاتا نیڤدەولەتى دکەین فشارەکێ بێخنە لسەر عیراقێ، داکۆ ڤرۆکخانەیێن هەرێما کوردستانێ ڤەکەن".

هەلز عەلى سەلیم