مامۆستایەکێ زانکۆیێ: عیراق سیستەمێ تائیفى و توندرەویى پەیرەو دکەت

مووسل-KDP.info- د. نائیف ئەلگەرگەرى مامۆستایێ زانکۆیا مووسل و چاڤدێرێ سیاسی راگەهاند، حکومەتا عیراقێ سیستەمێ تائیفى و توندرەویى پەیرەو دکەت و ب تایبەت دگەل خەلکێ دەڤەرێن دەرڤەیى هەرێما کوردستانێ و نەهێلا  بەندا (140) لگور دستورێ عیراقێ یێ سالا 2005ێ، بهێتە بجهئینان، نوکە ژى یێ بریارەێن نەرەوا دژى کوردان دەر دکەن.

(د. نائیف ئەلگەرگەرى)، مامۆستایێ زانکۆیا مووسل و چاڤدێرێ سیاسی، بۆ مالپەرێ فەرمیێ پارتى دیموکراتى کوردستان گۆت:"عیراقێ لگۆر دیرۆک و سیستەمێن حوکمرانیا خۆ، بەردەوام دژایەتیا مللەتێ کورد کریە و ب تایبەت لسەر دەمێ حکومەتا بەعس یا ژنافچویى، لێ مە هیڤیەک ب حکومەت و سیستەمێ فیدرالى هەبوو ژبۆ دانپێدانکرنێ ب مافێن کوردستانیان، ب مخابنى ڤە دەمێ 55 بەندێن دستورى پێشلکرین و ب تایبەت بەندا (140) ژ دستورێ عیراقێ نەهێلایى بهێتە بجهئینان، ئەم ژێ سیاسەت و پێکڤە ژیانێ دگەل وان بێ هیڤى بووین".

(نائیف ئەلگەرگەرى)، دا دیارکرن:"ب هیچ شێوەکى عیراق رازى نابیت کورد بگەهنە ئارمانجا خۆ، جونکى ئەو سیستەمێ تائیفى و توندرەویى پەیرەو دکەن و ب تایبەت دگەل خەلکێ دەڤەرێن دەرڤەیى هەرێما کوردستانێ، کۆ تا نوکە ژلایێ ئیدارى ڤە لژێر دەستهەلاتا عیراقێ ڤەنە و چ خزمەتان پێشکێشى خەلکى وان دەڤەرا ناکەن، لێ حکومەتا هەرێما کوردستانێ هەردەم هاریکارى و پێشتەڤانیێ لێ دکەن، ژبەر ڤێ ئێکێ  د گشتپرسیا سەربەخۆیا کوردستانێ دان، خەلکێ وان دەڤەرا پتر ژ 95% دەنگ ب بەلێ بۆ هەبوونا دەولەتا کوردستانێ دا".

(د. نائیف)، زەلالکر:" بریارێن پەرلەمان و سەرۆک وەزیرێ عیراقێ بتنێ گەفن و کڤاشتنێن لسەر خەلکێ کوردستانێ ژبۆ ژ گشتپرسیێ پاش بزڤرن، لێ ئیرادا مللەتێ کوردستانێ ژ پلانێن وان بهێزترە".

هەلز عەلى سەلیم