کچا هەلبەستڤان جەگەر خۆین: خەونا بابێ من بجهـ هات

 

دهۆک-KDP.info- رۆژین جەگەرخۆین، کچا هەلبەستڤانێ نیشتمانپەروەر جەگەر خۆین راگەهاند، ژبۆ پشکداریکرن و پیرۆزباهیێن سەرکەفتنا ریفراندۆما سەربەخۆیا کوردستانێ ژ ئەلمانیا هاتیمە كوردستانا باشور، دێ سەردانا هەمی باژێرێن کوردستانێ کەم بۆ ماوەیێ دوو هەیڤان.

 

کوردینو، مەردینو، پڕ خۆشە سەرخۆەبوون

ئەو دەمێن تار و تەنگ کو مە دین ڤانە چوون

دەست بدەن هەڤ هەمی پێشکەڤین ئەم هەمی

دا بجین بۆ وەلات یان مرن یان فەلات.

 

کچا هەلبەستڤانێ نیشتیمانپەروەرێ نەمر جەگەر خۆین بڤێ هەلبەستا بابێ خۆ دەست ب ئاخفتنێ کر. (رۆژین جەگەر خۆین)، بۆ ماڵپەڕێ فەرمیی پارتی دیموکراتی کوردستان گۆت: "سەربلندم نوکە ل کوردستانێ مە، ژبەر خەونا بابێ من بۆ ئیرادا میللەتێ ژبۆ سەربەخۆیێ بجه هات".

 

(رۆژین جەگەر خۆین)، خویاکر: "ژ ئەلمانیا هاتیمە باشورێ کوردستانێ، دا پیرۆزباهیان ئاراستەیێ خەلکێ خۆراگرێ کوردستانێ و سەرکردایەتیا سیاسی و ب تایبەت سەرۆک (مەسعود بارزانی) و روحا بابێ خۆ و هەمی شەهیدێن کوردستانێ بکەم".

 

کچا هەلبەستڤانێ نەمر جەگەر خۆین زەلالکر: "دخوازم هەمی کورد د ئێکگرتی بن و دەمە کوردستانی پێکڤە پێک بهێن لسەر پرسێن نەتەوەیی و نیشتیمانی، ژبەر دوژمنێن مە گەلەکن، دهەمان دەمدا ئیرادا پێشمەرگەیێ قەهرەمان و خەلکێ خوراگرێ کوردستانێ ل بیرا مە هەمیان بیت، جونکی بو سەربەخۆیا کوردستانێ ب خۆین و دەنگ دایە و بڤێ رێبازێ دێ کوردستانێ ئازاد کەن".

 

(رۆژینێ)، پتر بەحسکر و دا خویاکرن:" هەر دەمێ کوردستانا باشور بو دەولەت، دێ هەر سێ پارچەیێن دیتر یێن کوردستانێ ژبن دەستیێ رزگار بن، چاڤێ مە ل کوردستانێ یە بۆ سەربەخۆیێ، دا ئەم ژی هەست ب ئازادیێ بکەین".

 

هەلز عەلی سەلیم