وەزارەتی خوێندنی باڵا: ماوەی زانکۆلاین درێژکرایەوە.. لەو دوورۆژەدا پەلەبکەن
ھەولێر-KDP.info- ڕاگەیاندنی وەزارەتی خوێندنی باڵاو توێژینەوەی زانستی بڕیاریدا ماوەی (زانکۆلاین) تا ( ٣٠/٩/٢٠١٧) درێژ بکرێتەوە، لەپێناو پێدانی دەرفەتی زیاتر بەخوێندکاران بۆ پڕکردنەوەی فۆرمی زانکۆلاین.
سەرچاوەیەک لە ڕاگەیاندنی وەزەراتی خوێندنی باڵاو توێژینەوەی زانستی رایگەیاند: "لەپێناو پێدانی دەرفەتی زیاتر بەخوێندکاران بۆ پڕکردنەوەی فۆرمی زانکۆلاین، بڕیاردرا ماوەی زانکۆلاین (٤٨) سەعاتی دیکە واتە تا سەعات (١٢) شەوی شەممە رێکەوتی (٣٠/٩/٢٠١٧ ) بۆ دەرچووانی خوولی یەکەم و دووەمی قۆناغی دووانزەی ئاماەیی درێژکرایەوە .
ئەوسەرچاوەیەی وەزارەتی خوێندنی باڵا گوتیشی: "لەپێناو بەرژەوەندی گشتی و پێدانی دەرفەتی زیاتر بەخوێندکارانن، بەتایبەت ئەو خوێندکارانەی خوولی یەکەم کە بەھەر ھۆکاربێت نەیانتوانی فۆرمی زانکۆلاین پڕبکەنەوە, ئێستا دەتەوانن بەھەمان شێوەی خوێندکارانی دەرچووی خوولی دووەمی قۆناغی دوانزەیی ئامادەیی سوودمەندبن و فۆرمی زانکۆلاین پڕبکەنەوە."
وەزارەتی خوێندنی باڵا گوتیشی: "ئەمە دواین دەرفەتەو چیتر ماوەکە درێژناکرێتەوە, ھەربۆیە داوا لە دەرچووانی خوولی یەکەم و دووەمی قۆناغی دووانزەی ئامادەیی دەکەین، کە تائێستا فۆرمی (زانکۆلاین)ـنیان، پڕنەکردۆتەوە، پێویستە لەماوەی ئەو دوورۆژەدا پەلەبکەن و تەواوی ھەوڵەکانیان بخەنە گەڕ بۆ پڕکرنەوەی فۆرمی زانکۆلاین ."
فایزە کۆیی
