بروسكەی هاوخەمیی سەرۆك بارزانی بۆ خانەوادەی خوالێخۆشبوو قادر جەباری

هەولێر-KDP.info-  سەرۆک بارزانی بۆ کۆچی دوایی قادر جەباری، بروسکەیەکی سەرەخۆشی ئاراستەی خانەوادەی خوالێخۆشبوو هەڤاڵ قادر جەباری کرد کە ئەمە دەقەکەیەتی:

به‌ناوی خوای مه‌زن و دڵۆڤان

بۆ خانەوادەی خوالێخۆشبوو هەڤاڵ قادر جەباری

    سڵاوی خواتان لێ بێت

به‌ بیستنی هه‌واڵی كۆچی دوایی شۆڕشگێڕ و پێشمه‌رگه‌ی ماندوونەناس هەڤاڵ قادر جه‌باری زۆر خەمناك بووم. خوالێخۆشبوو كەسایەتییەكی كوردپەروەر و تێكۆشەر بوو كە لە شۆڕشی مەزنی ئەیلوول و خەباتی شاخ و شار و دوای ڕاپەڕین ڕۆڵی بەرچاوی خۆی بە باشی گێڕاوە.
خوالێخۆشبوو قادر جه‌باری، له‌مێژووی پێشمه‌رگایه‌تی و به‌رپرسیاریه‌تیدا هه‌میشه‌ دڵسۆزانە كاری كردووە و جێگه‌ی متمانەی سەركردایەتیی شۆڕش بووە ‌، له‌ خزمه‌تكردنی دۆزی ڕەوای نه‌ته‌وه‌كه‌ی، راستگۆیانه‌ و سه‌ربه‌رزانه‌ خه‌باتی كردووه‌. سەرەخۆشی لە خۆمان و ئێوە و خزم و كەسوكار و هاوسەنگەرانی هەڤاڵ قادر جەباری دەكەم و هاوبەشی خەمتانم.
له‌ خوای گه‌وره‌ داواكارم، سه‌بوری و ئارامی به‌ خانه‌واده‌ و هه‌ڤاڵانی ببه‌خشێ و خوالێخۆشبوویش به‌ به‌هه‌شتی به‌رین شاد بكات.

انا لله‌ وانا الیه‌ راجعون
مەسعوود بارزانی
12ـی 11ـی 2016