سەرۆكی هەرێمی كوردستان پێشوازی لە سەرۆكی ئەنجوومەنی نیشتیمانیی كورد لە سووریادا کرد
هەولێر-KDP.info- سەرۆک بارزانی لە پێشوازی سەرۆكی ئەنجوومەنی نیشتیمانیی كورد لە سووریادا ناڕەزایی خۆی نیشاندا بەرانبەر ئەو كارەی هێزەكانی پەیەدە لەدژی سەرۆكی ئەنجوومەنی نیشتیمانیی كورد لە سووریا ئەنجامیان داوە و بە كارێكی دژی دیموكراسی فرەلایەنی و خنكاندنی ئازادی وەسف كرد و بە توندی ئیدانەی كرد.
ڕۆژی دووشەممە 15ـی 8ـی 2016 لە سەلاحەدین مەسعوود بارزانی سەرۆكی هەرێمی كوردستان پێشوازی لە ئیبراهیم برۆ سەرۆكی ئەنجوومەنی نیشتیمانیی كورد لە سووریا كرد.
لە دیدارەكەدا سەرۆكی ئەنجوومەنی نیشتیمانیی كورد لە سووریا باسی لە بارودۆخی سیاسیی سووریا كرد و هەروەها ڕۆشنایی خستەسەر ڕووداوی دەستبەسەركردنی خۆی لە لایەن هێزەكانی پەیەدە لە ڕۆژئاوای كوردستان و باسیشی لە ناڕەزایەتیی و خۆپێشاندانی خەڵكی ڕۆژئاوا كرد لەدژی دەستگیركردنی لە لایەن دەستەڵادارانی ڕۆژئاوای كوردستان.
هەر لەم دیدارەدا سەرۆك بارزانی ناڕەزایی خۆی نیشاندا بەرانبەر ئەو كارەی هێزەكانی پەیەدە لەدژی سەرۆكی ئەنجوومەنی نیشتیمانیی كورد لە سووریا ئەنجامیان داوە و بە كارێكی دژی دیموكراسی فرەلایەنی و خنكاندنی ئازادی وەسف كرد و بە توندی ئیدانەی كرد.
لە بەشێكی دیكەی كۆبوونەوەكەدا جەخت لەوە كرایەوە كە ڕێگەگرتن لە ئازادیی سیاسی و دەستگیركردنی كەسایەتە سیاسییەكان لە لایەن پەیەدەوە داهێنانی نەریتێكی ناشرین و ناشارستانییە و دژی بنەماكانی كوردایەتی و نیشتیمانپەروەرییە و پێویستە ڕێگەی لێ بگیرێت و كۆتایی پێ بهێنرێت.
