سه‌رۆك بارزانی و وه‌زیری به‌رگریی ئه‌مه‌ریكا، شەڕی داعش و هاوكاریكردنی پێشمەرگەیان خسته به‌ر باسه‌وه
هه‌ولێر-KDP.info- لە پەیوەندییەكی تەلەفۆنیدا، (سەرۆك بارزانی) و وەزیری بەرگریی وڵاتە یەكگرتووەكانی ئەمەریكا، شەڕی داعش و هاوكاریكردنی پێشمەرگە تاوتوو كرا.
ئه‌مڕۆ دووشەممە 11ـی 7ـی 2016، لە پەیوەندییەكی تەلەفۆنیی نێوان (مەسعوود بارزانی) سەرۆكی هەرێمی كوردستان و (ئاشتن كارتەر) وەزیری بەرگریی وڵاتە یەكگرتووەكانی ئەمەریكادا، دواگۆڕانكارییە مەیدانییەكانی شەڕی تیرۆریستانی داعش و هەماهەنگیی نێوان هێزی پێشمەرگە و هاوپەیمانان و هێزەكانی عێراقی لە شەڕی تیرۆریستان، هەروەها هاوكاریكردنی وڵاتە یەكگرتووەكانی ئەمەریكا بۆ هێزی پێشمەرگەی كوردستان تاوتوو كرا.
هەر لەو پەیوەندییە تەلەفۆنییەدا وەزیری بەرگریی ئەمەریكا جەختی لە بەردەوامی و پابەندبوونی وڵاتەكەی بۆ هاوكاریكردنی هێزی پێشمەرگەی كوردستان كردەوە، خۆشحاڵیی خۆیشی لە هەماهەنگی و هاوكاریی نێوان هێزی پێشمەرگە و هێزەكانی عێراق نیشان دا.
لە بەشێكی دیكەی ئەو پەیوەندییە تەلەفۆنییەدا (سەرۆك بارزانی) سوپاسی سوپای ئەمەریكا و هێزە هاوپەیمانەكانی كرد لە پشتیوانیكردنی پێشمەرگە لە شەڕی تیرۆریستان، هەروەها پێزانینی هەبوو بۆ بڕیاری وڵاتە یەكگرتووەكانی ئەمەریكا بۆ هاوكاریكردنی هێزی پێشمەرگەی كوردستان.
