سەرۆكی هەرێمی كوردستان پێشوازی لە سەرۆكی ئەنجوومەنی نوێنەرانی عێراق کرد
هەولێر-KDP.info- سەرۆكی هەرێمی كوردستان پێشوازی لە سەرۆكی ئەنجوومەنی نوێنەرانی عێراق کرد و، لەدیدارەکەدا هەردوولا جەختیان لەسەر دیالۆگ و لێكتێگەییشتنی نێوان لایەنەكان كردەوە بۆ چارەسەری گرفتەكان.
ڕۆژی دووشەممە ٢٣ـی ٥ـی ٢٠١٦ لە سەلاحەدین (مەسعوود بارزانی) سەرۆكی هەرێمی كوردستان پێشوازی لە (سەلیم ئەلجبووری) سەرۆكی ئەنجوومەنی نوێنەرانی عێراق و شاندێكی یاوەری كرد.
لە دیدارەكەدا بارودۆخی سیاسی و قەیران و ڕووداوە سیاسییەكانی ئەم دواییەی عێراق خرایە بەر باس و گفتوگۆ و باس لە ڕێگەچارەكان كرا بۆ یەكلاییكردنەوەی كێشەكان. هەردوولا جەختیان لەسەر دیالۆگ و لێكتێگەییشتنی نێوان لایەنەكان كردەوە بۆ چارەسەری گرفتەكان.
لە دیدارەکەدا سەرۆکی ئەنجوومەنی نوێنەران ڕایگەیاند کە فراکسیۆنەکانی ئەنجوومەنی نوێنەران لە کۆبوونەوە و ڕاگۆڕێنەوەی بەردەوامدان بۆ ئەوەی بگەنە چارەسەرێکی هاوبەش و لیژنەکانی ئەنجوومەنی نوێنەران لەسەر کارەکانی خۆیان بەردەوامن.
لە بەشێكی دیكەی كۆبوونەوەكە تیشك خرایە سەر بارودۆخی ئەمنی و شەڕی تیرۆریستانی داعش و سەركەوتنەكانی هێزی پێشمەرگەی كوردستان و هێزە عێراقییەكان.
