سه‌رۆك بارزانی: ''پێشەوا قازی، ئێمە لەژێر سێبەری ئەو ئاڵایەی تەسلیمی بارزانیتان كردووە، ئەمڕۆ سەربەرز و سەرفیرازین''؛ ڤیدیۆیی
زاخۆ-KDP.info- له مەراسیمی دەرچوونی 201 ئەفسەری كچ لە خولی بیست و یەكی ئاكادیمیای سەربازیی زاخۆدا (سه‌رۆك بارزانی) رایگەیاند، ناوی پێشمەرگە جێگەی شانازییە لە سەرتاسەری جیهان و جیهان شانازی بە كوڕ و كچانی پێشمەرگە دەكات. هاوكات باسی لە ساڵیادی شەهیدكردنی (پێشەوا قازی) كرد و گوتی: "پێشەوا دەڵێین ئێمە لەژێر سێبەری ئەو ئاڵایەی تەسلیمی بارزانیتان كردووە، ئەمڕۆ سەربەرز و سەرفیرازین".
ئه‌مڕ چوارشەممە 30ـی 3ـی 2016، بە ئامادەبوونی (مەسعوود بارزانی) سەرۆكی هەرێمی كوردستان، مەراسیمی دەرچوونی 201 ئەفسەری كچ لە خولی بیست و یەكی ئاكادیمیای سەربازیی زاخۆ بەڕێوە چوو.
لەم مەراسمیەدا كە بە ئامادەبوونی كۆنسووڵ و نوێنەری وڵاتانی بیانی و ژمارەیەكی زۆر لە بەرپرسانی سیاسی و سەربازی و ئیداری و جەماوەری شاری زاخۆ ئامادە بوون، دوای بەخشینی بڕوانامە و سوێندی سەربازی بۆ ئەفسەرانی كچ، (سەرۆك بارزانی) وتەیەكی پێشكەش كرد و ئاماژەی بە قوربانیدان و ئازایەتی پێشمەرگە كرد و رایگەیاند، ناوی پێشمەرگە جێگەی شانازییە لە سەرتاسەری جیهان و جیهان شانازی بە كوڕ و كچانی پێشمەرگە دەكات.
سەرۆكی هەرێمی كوردستان وێڕای پیرۆزبایكرن و دەستخۆشیكردن لە كچە ئەفسەرەكان و مامۆستا و سەرپەرشتیارانی ئەكادیمیای سەربازی زاخۆ، هێمای بە قوربانیدان و شۆڕشگێڕیی شاری زاخۆ كرد و ڕایگەیاند زاخۆ شایەنی هەموو جۆرە خزمەتێكە و لانكەی بەرخودانە.
(سەرۆك بارزانی) لە درێژەی وتەكەیدا باسی شەڕی دژی داعشی كرد و گوتی "لە شەڕی دژی داعشدا پێشمەرگە كوڕ و كچەكان ئازایەتیی خۆیان بۆ جیهان سەلماند و، جێی شانازییە ناوی پێشمەرگە لە سەرتاسەری جیهان بووەتە ناوێكی پیرۆز و هێمای بەرخودان و شكاندنی ئستورەی داعش".
(سەرۆك بارزانی) سەبارەت بە ئەركی كچان و كوڕان لە بەرگریكردن لە نیشتیمان، جەختی لەوە كردەوە، كە جیاوازی لەنێوان پێشمەرگەی كوڕ و كچدا نییە و لە شەڕی دژی داعشدا سەلماندییان، كوردستان لە هەموو شتێك بەنرختر و شیرنترە.
لە كۆتایی وتەكەیدا (سەرۆك بارزانی) باسی لە ساڵیادی شەهیدكردنی (پێشەوا قازی) كرد و گوتی: "پێشەوا دەڵێین ئێمە لەژێر سێبەری ئەو ئاڵایەی تەسلیمی بارزانیتان كردووە، ئەمڕۆ سەربەرز و سەرفیرازین".
هەر لەم مەراسیمەدا (سەرۆك بارزانی) خەڵاتی بەخشیە ئەفسەرانی كچی یەكەم و دووەم و سێیەمی خولەكە.
