پەیامی پیرۆزبایی و دەستخۆشیی سەرۆكی هەرێمی كوردستان بۆ هێزی پێشمەرگەی كوردستان

 

هه‌ولێر-KDP.info- (مەسعوود بارزانی) سەرۆكی هەرێمی كوردستان، بەبۆنەی سەركەوتنیانه‌وە پەیامی پیرۆزبایی و دەستخۆشیی بۆ هێزی پێشمەرگەی كوردستان ده‌نێرێت و ده‌ڵێت،  هەتا گەلی كوردستان خاوەنی ڕۆڵەی چاونەترس و ئازای وەك ئێوە بێت، هەمیشە سەرشۆڕی و شكست بۆ دوژمنان و ناحەزان دەمێنێتەوە.

 

ده‌قى پەیامی پیرۆزبایی و دەستخۆشیی سەرۆكی هەرێمی كوردستان بۆ هێزی پێشمەرگەی كوردستان

 

بەناوی خودای بەخشندە و میهرەبان

 

سەر لە بەیانیی ڕۆژی هەینی 4ـی 3ـی 2016 تیرۆریستانی داعش پەلامارێكی بەرفراوانیان كردە سەر سەنگەرە پۆڵایینەكانی هێزی پێشمەرگە لە میحوەری ڕۆژئاوای دیجلە و لە چواڕیانی كەسكێ و ئەسكی مووسڵ. سوپاس بۆ خودای مەزن ئەو هێرشەی تیرۆریستان لە لایەن هێزی پێشمەرگەی كوردستان تێكشكێندرا و زیانێكی گەورە لە دوژمن درا و پێشمەرگە داستانێكی كەم وێنەی لە بەرانبەر تیرۆریستان تۆمار كرد.

 

بەبۆنەی ئەو سەركەوتنە مەزنە پیرۆزبایی لە گەلی كوردستان و هەموو پێشمەرگە قارەمانەكان دەكەم. سوپاسی فەرماندە و پێشمەرگەكانی میحوەری ڕۆژئاوای دیجلە و فەرماندەیی زێرەڤانی و فەرماندەیی دهۆك و فەرماندەیی هێزی پشتیوانی و لەشكری ڕۆژی ڕۆژئاوا و هێزی ئیحتیاتی ڕۆژئاوای دیجلە دەكەم و دەستخۆشیان لێ دەكەم كە بەشداری ئەو سەركەوتنە بوونە و دوژمنیان تێكشكاندووە  و هیوای چاكبوونەوەی خێرا بۆ برینداران دەخوازم. بە پێویستی دەزانم سوپاسی هێزی هاوپەیمانان بكەم كە بە پشتیوانیی ئاسمانی پاڵپشتی هێزی پێشمەرگەی كوردستان بوون.  پێزانینی بێ سنوورم هەیە بۆ دلێری و قارەمانێتی هێزی پێشمەرگە لە گشت میحوەرەكانی شەڕی بەرگریكردن لە گەل و نیشتیمان. هەتا گەلی كوردستان خاوەنی ڕۆڵەی چاونەترس و ئازای وەك ئێوە بێت، هەمیشە سەرشۆڕی و شكست بۆ دوژمنان و ناحەزان دەمێنێتەوە.

 

هەر بمێنن بۆ كورد و كوردستان و هیوای تەمەندرێژی و سەركەوتنتان بۆ دەخوازم.

 

مەسعوود بارزانی

 

سەرۆكی هەرێمی كوردستان

 

4ـی 3ـی 2016