سەرۆك بارزانی سه‌ركه‌وتنی هێزی پێشمەرگەی كوردستان پیرۆز دەكات
هه‌ولێر-KDP.info- (سەرۆك بارزانی) دەستخۆشی لە جێگری سەرۆكی هەرێم و سەرپەرشتیاری میحوەرەكانی كەركووك و، وەزیری پێشمەرگە و فەرماندەی یەكەی حەفتا و هەموو ئەو پێشمەرگە و فەرماندە و هێزەكانی ئاساییش كرد، كە بەشداری ئەو ئۆپڕاسیۆنە بوونە؛ هاوكات سوپاسی قارەمانێتیی ئەوانی كرد و هیوای سەركەوتنی بۆ خواستن. هەروەها سەرەخۆشیشی لە كەسوكاری شەهیدان كرد و هیوای چاكبوونەوەی بۆ برینداران خواست.
دوای ئەوەی لە بەرەبەیانی ڕۆژی چوارشەممە 26ـی 8ـی 2015 هێزەكانی پێشمەرگەی كوردستان لە ئۆپه‌ڕاسیۆنێكی بەرفراواندا لە میحوەری باشووری كەركووك هێرشیان كردە سەر مۆڵگەكانی تیرۆریستانی داعش، بەڕێزان (كۆسرەت ڕەسووڵ عەلی) جێگری سەرۆكی هەرێمی كوردستان) و (محەممەدی حاجی مەحموود) سەرپەرشتیاری میحوەرەكانی كەركووك و (مستەفا سەیدقادر) وەزیری پێشمەرگە و (جەعفەر شێخ مستەفا) فەرماندەی یەكەی حەفتا بە جیا و، لە ڕێی تەلەفۆنه‌وه، بەڕێز سەرۆكی هەرێمی كوردستانیان لە سەركەوتنەكانی پێشمەرگە و تێكشكاندنی تیرۆریستان و ئازادكردنی سەرجەم ئەو شوێنانەی كە لە پلانی هەڵمەتی هێزی پێشمەرگەدا هەبوو ئاگادار كردەوە.
هەر لەم پەیوەندییە تەلەفۆنیانەدا بەڕێزان جێگری سەرۆكی هەرێم و سەرپەرشتیاری میحوەرەكانی كەركووك و وەزیری پێشمەرگە و فەرماندەی یەكەی حەفتا، بە بۆنەی ئەم سەركەوتنەی هێزی پێشمەرگەی كوردستان پیرۆزباییان لە (سەرۆك بارزانی) و گەلی كوردستان كرد.
لە بەرانبەردا (سەرۆك بارزانی) دەستخۆشی لە جێگری سەرۆكی هەرێم و سەرپەرشتیاری میحوەرەكانی كەركووك و وەزیری پێشمەرگە و فەرماندەی یەكەی حەفتا و هەموو ئەو پێشمەرگە و فەرماندە و هێزەكانی ئاساییش كرد، كە بەشداری ئەو ئۆپڕاسیۆنە بوونە و سوپاسی قارەمانێتیی ئەوانی كرد و هیوای سەركەوتنی بۆ خواستن. هەروەها سەرەخۆشیشی لە كەسوكاری شەهیدان كرد و هیوای چاكبوونەوەی بۆ برینداران خواست.
