سەرۆک بارزانی بۆ حەمەی حاجی مەحموود: كوڕی بەڕێزتان كوڕی منە.. خوێنی شەهیدانمان بەفیڕۆ ناچێت
هەولێر-KDP.info- سەرۆكی هەرێمی كوردستان لە پەیوەندییەكی تەلەفۆنیدا، هاوخەمیی خۆی بە بەڕێز حەمەی حاجی مەحموود ڕاگەیاند بەهۆی شەهیدبوونی كوڕە گەورەكەی لە بەرەكانی شەڕی دژی تیرۆریستانی داعش. هاوکات ڕایگەیاند، "كوڕی بەڕێزتان كوڕی منە، هەموو ئەو پێشمەرگە قارەمانانەی لە شەڕی بەرگریكردن لە كەرامەتی گەلەكەیان گیانی خۆیان فیدا كردووەو ڕۆڵەی من و تۆن."
سەرۆك بارزانی لە پەیوەندییەكی تەلەفۆنیدا سەرەخۆشی لە حەمەی حاجی مەحموود كرد
بەڕێز مەسعود بارزانی سەرۆكی هەرێمی كوردستان لە پەیوەندییەكی تەلەفۆنیدا هاوخەمیی خۆی بە بەڕێز حەمەی حاجی مەحموود ڕاگەیاند بەهۆی شەهیدبوونی كوڕە گەورەكەی لە بەرەكانی شەڕی دژی تیرۆریستانی داعش.
سەرۆك بارزانی لەو پەیوەندییەدا سەرەخۆشی لە خۆی و بەڕێز حەمەی حاجی مەحموود كرد و گوتی: "كوڕی بەڕێزتان كوڕی منە، هەموو ئەو پێشمەرگە قارەمانانەی لە شەڕی بەرگریكردن لە كەرامەتی گەلەكەیان گیانی خۆیان فیدا كردووەو ڕۆڵەی من و تۆن. هەر هەموومان بۆ شەهیدبوونی ڕۆڵە قارەمانەكانی گەلەكەمان خەمبار و خاوەن پرسەین و هاوبەشی خەمی یەكترین".
هەر لەم پەیوەندییەدا، سەرۆك بارزانی سەرەخۆشیشی لە كەسوكار و خانەوادەی هەموو ئەو پێشمەرگانە كرد كە قارەمانانە خوێنی خۆیان لەپێناو سەربەرزیی گەلەكەیان بەخشیوە و ئەوەیشی دووپات كردەوە كە "خوێنی شەهیدانمان بەفیڕۆ ناچێت."
