فەرماندەی فەرماندەیی ناوەندیی هێزەكانی ئەمەریكا: پێشمەرگە ئوستوورەی داعشی تێك شكاند
هەولێر-KDP.info- فەرماندەی فەرماندەیی ناوەندیی هێزەكانی ئەمەریكا، لەبارەی سەركەوتنەكانی پێشمەرگەوە ڕایگەیاند، لەسەر ئەرزی واقیعدا پێشمەرگە توانی ئوستوورەی داعش تێك بشكێنێ و بیكاتە هێزێكی بەزیو كە ناتوانێ خۆی ڕابگرێت. زیاتر گوتی، ئێستا بە هۆی سەركەوتنەكانی پێشمەرگەوە لە ڕەبیعە و زوومار داعش تووشی شپرزەیی و بێورەیی هاتووە.
ئەمڕۆ سێشەممە، لە شاری هەولێر سەرۆكی هەرێمی كوردستان(مەسعوود بارزانی)، پێشوازی لە فەرماندەی فەرماندەیی ناوەندیی هێزەكانی ئەمەریكا، ژەنەڕاڵ (لۆید ئۆستن) و شاندێكی یاوەری كرد كە پێك هاتبوون لە باڵیۆزی وڵاتە یەكگرتووەكانی ئەمەریكا لە عێراق(ستیوارت جۆنز) و ژمارەیەك بەرپرس و ڕاوێژكاری سەربازیی پێنتاگۆن و سوپای ئەمەریكا.
لە دیدارێكدا كە ڕاوێژكاری ئەنجوومەنی ئاساییشی هەرێمی كوردستان(مەسروور بارزانی) و سەرۆكی دیوانی سەرۆكایەتیی هەرێم(فواد حوسێن) و وەزیری پێشمەرگە(مستەفا سەیدقادر) و جێگری وەزیری پێشمەرگە(ئەنوەر حاجی عوسمان) و (جەعفەر شێخ مستەفا و فەریق شێروان و جەبار یاوەر) ئەندامانی فەرماندەیی هێزەكانی پاراستنی هەرێمی كوردستان و گوتەبێژی حكوومەتی هەرێمی كوردستان(سەفین دزەیی) ئامادەی بوون، سەرەتا ژەنەڕاڵ (لۆید ئۆستن) پیرۆزبایی ئەو سەركەوتنانەی لە (سەرۆك بارزانی) كرد كە هێزەكانی پێشمەرگە لەژێر سەرپەرشتیی (سەرۆك بارزانی) لە بەرەكانی شەڕدا بە دەستیان هێناوە و سەرەخۆشیشی لە كەسوكار و خانەوادەی ئەو پێشمەرگانە كرد كە لەم شەڕانەدا گیانی خۆیان بەخت كردووە و شەهید بوونە.
ژەنەڕاڵ (لۆید ئۆستن) لەبارەی سەركەوتنەكانی پێشمەرگە زیاتر قسەی كرد و ئەوەی خستەڕوو كە لەسەر ئەرزی واقیعدا پێشمەرگە توانی ئوستوورەی داعش تێك بشكێنێ و بیكاتە هێزێكی بەزیو كە ناتوانێ خۆی ڕابگرێت. ئێستا بە هۆی سەركەوتنەكانی پێشمەرگە لە ڕەبیعە و زوومار داعش تووشی شپرزەیی و بێورەیی هاتووە.
فەرماندەی فەرماندەیی ناوەندیی هێزەكانی ئەمەریكا جەختی لەوەیش كردەوە كە هێزەكانی وڵاتەكەی بۆ هەر ئۆپەراسیۆنێك و لە هەر بەرەیەك كە پێشمەرگە نیازی پێشڕەوی هەبێت ئامادەییە بەردەوام بێت لە پاڵپشتیی ئاسمانیی هێزی پێشمەرگەی كوردستان. ژەنەڕاڵ (لۆید ئۆستن) سوپاسی (سەرۆك بارزانی) و هەرێمی كوردستانیشی كرد بۆ ئەو یارمەتی و هاوكارییه سەربازییانەی هەرێمی كوردستان بۆ كۆبانیی ڕەوانە كردووە.
لەبەرانبەردا (سەرۆك بارزانی) بەخێرهاتنی ژەنەڕاڵ (ئۆستن) و شاندی یاوەری كرد و سوپاسی پاڵپشتیی سەربازییەكانی ئەمەریكا و هێزی هاوپەیمانی كرد. لەبارەی بەرەكانی شەڕ و بارودۆخی پێشمەرگە (سەرۆك بارزانی) ئەوەی خستەڕوو كە دوژمن توانای ڕووبەڕووبوونەوەی ڕاستەوخۆی نەماوە و ئێستا لە هەموو كاتێك زیاتر ئیرادەی گەلی كوردستان و هێزی پێشمەرگە بەهێزە بۆ پاراستنی كوردستان و تێكشكاندنی تیرۆریستانی داعش. (سەرۆك بارزانی) خۆشحاڵیی خۆی بۆ خۆڕاگریی و بەرخودانی كۆبانێ نیشاندا و سوپاسی هێزەكانی ئەمەریكای كرد كە هاوكاریی سەربازیی كاریگەریان پێشكەشی كۆبانی كردووە.
هەر لەم دیدارەدا بارودۆخی مەیدانیی بەرەكانی شەڕ و پێویستییەكانی هێزی پێشمەرگە قسەی لەسەر كرا و جەخت لەوە كرایەوە كە پێویستە هەموو ناوچەكان لە تیرۆریستانی داعش پاك بكرێنەوە و هەردوولا ئەوەیان دووپات كردەوە كە هەرێمی كوردستان و ئەمەریكا لە یارمەتیدانی كۆبانێ بەردەوام دەبن.
قسەكردن لەبارەی گەیاندنی هاوكاری و یارمەتیدانی ئەو خەڵك و پێشمەرگانەی لە چیای شنگالدا ماون و لە شەڕی بەردەوام دان، تەوەرێكی دیكەی ئەم دانیشتنە بوو.
