لیژنەی لێكۆڵینەوە لە ڕووداوەكانی شنگال لە كارەكانی بەردەوامە.. كەمتەرخەمەكان ڕووبەڕووی دادگە دەكرێنەوە
هەولێر-kdp.info- وەزارەتی پێشمەرگەی حكوومەتی هەرێمی كوردستان ڕایگەیاند، لیژنەی لێكۆڵینەوە لە ڕووداوەكانی شنگال دەستبەكار بووە، لە لێكۆڵینەوەكانیش بەردەوامە و ئەو لیژنەیە بڕیار دەدات كێ ڕووبەڕووی دادگە دەكرێتەوە.
بەڕێوەبەری راگەیاندنی وەزارەتی پێشمەرگەی حكوومەتی هەرێمی كوردستان عەمید (هەڵگورد حیكمەت) بە kdp.info-ی راگەیاند، لەسەر فەرمانی سەرۆكی هەرێمی كوردستان لیژنەیەكی یاسایی پێك هاتووە كە سێ كەس لە خۆ دەگرێت و نوێنەری سەرۆكایەتیی هەرێم و وەزارەتی پێشمەرگەیشی تێدایە و لێكۆڵینەوە لە ڕووداوەكانی شنگال دەكەن و تاوەكو ئێستایش لێكۆڵینەوەكان بەردەوامن.
(حیكمەت) گوتیشی، تاوەكو ئێستا لیژنەكە كۆتایی بە لێكۆڵینەوەكان نەهێناوە و بەردەوامە لە كارەكان، خۆیشیان بڕیار لەبارەی ئەو ڕووداوانە دەدەن كە كێ كەمتەرخەم بووە و كێیش ڕووبەڕووی دادگە دەكرێتەوە.
ئەو هەروەها ڕوونیشی كردەوە، ئەو كەسانەی لەو ڕووداوانەدا كەمتەر خەم بوون، لەلایەن دادگەوە سزای خۆیان وەردەگرن.
بڵند ئیبراهیم
