زوممار.. بۆردوومانكردنی زەوینی و ئاسمانیی مۆڵگەكانی داعش بەردەوامە

زوممار-KDP.INFO-  بەرپرسی ناوچەی دیجلەی پارتیی دیموكراتی كوردستان لە زوممار دەڵێت، لە دوێنێوە هێزی پێشمەرگە و فڕۆكە ئەمەریكاییەكان بۆردوومانی مۆڵگەكانی داعش لە میحوەری زوممار دەكەن و زیانێكی زۆریان پێ گەیاندوون.

 

بەرپرسی ناوچەی دیجلەی پارتیی دیموكراتی كوردستان لە زوممار(حەسەن خەلۆ) بە kdp.info-ی راگەیاند، لە ئێستادا تەواوی ناوچە ستراتیژییەكانی زوممار لە دەست هێزی پێشمەرگەدان و چەكدارانی داعش و لایەنگرانیان لەو ناوچەیە بە رێژەی 95% كەم بوونەتەوە و بەردەوام لە پاشەكشەدان.

بەپرسی ناوچەی دیجلەی پارتیی دیموكراتی كوردستان ڕوونیشی كردەوە، لە دوێنێوە لە ناوچەی زوممار هێزی پێشمەرگە و فڕۆكە جەنگییەكان بە بەردەوامی مۆڵگەكانی داعش بۆردوومان دەكەن و لەو ناوچەیەدا داعش سێ بارەگای سەرەكییان هەبوو، هەرسێكیان كراونەتە ئامانج.

(خەلۆ) زیاتر گوتی، لە ئێستادا لە ترسی هێرشی پێشمەرگە زۆر شوێن و تەنانەت ئاڵاكەی خۆیشیان بۆمبڕێژ كردووە.

ئەو هەروەها راشیگەیاند، ئەگەر هێزی پێشمەرگە هێرش بكات بە بێ شەڕ زوممار كۆنتڕۆڵ دەكات، چونكە ژمارەیان زۆر كەم بووە، بەڵام چاوەڕێی فەرمان دەكەن.

بڵند ئیبراهیم