ئەمەریکا ڕێی لێ نەگرت.. نەوتی کوردستان لە تێکساس بەتاڵ دەکرێت
هەولێر-KDP.INFO- بەرپرسێک دەڵێت، ئەو کەشتییە بارهەڵگرەی نەوتی کوردستانی گەیاندە وڵاتە یەکگرتووەکانی ئەمەریکا، لە ئێستادا لە نزیک بەندەری چالڤستۆن لە ویلایەتی تێکساس بەتاڵ دەکرێت و بەرلەوەی ڕێ بدرێت نەوتەکە دابگیرێت، ئەمڕۆ یەکشەممە لە لایەن تیمی ئیشکگری کەناراوەکانی ئەمەریکاوە پشکێنراوە.
ئەو کەشتییەی کە ئاڵای دەریاوانیی مارشاڵی بەسەرەوە بوو، لە مانگی یۆنیۆ-حوزێران، بەندەری جەیهانی تورکیای بەرەو کەناراوەکانی ئەمەریکا لە دوورگەی مەکسیک جێ هێشت، ئەمە سەرباری ئەو ڕاڕاییەی واشنتۆن بەرانبەر بە فرۆشتنی سەربەخۆییانەی نەوتی کوردستان و ەڕەشەکانی حکوومەتی عێراق.
بەپێی هەواڵێکی ڕۆیتەرز، (ئاندی کەندریک) کە ئەفسەری دەریاوانییە، ڕایگەیاند، ئەمڕۆ یەکشەممە و پاش پشکنینی کەشتییەکە و چونکە کیشەیەکی ئەوتۆی نەبوو، بەتاڵکردنی نەوتی کوردستان دەستی پێ کردووە.
ئەو ئەفسەرە گوتیشی، هێزەکانی دەریاوانی، لەبارەی گەیشتنی ئەو کەشتییەوە، پێوەندی بە ئەنجوومەنی ئاساییش و وەزارەتی دەرەوە و ئاساییشی ئەمەریکاوە کردووە.
نەوتە بارکراوەکە نزیکەی ملیۆنێک بەرمیل دەبێ کە لە ڕێی بۆرییە نوێیەکەی کوردستانەوە گەیەندرابووە بەندەری جیهانی تورکیا و نرخی جیهانییەکەی زیاتر لە 100 ملیۆن دۆلاری ئەمەریکاییە.
سەرکەوت حەسەن
