سەرۆكێ جڤاتا پارێزگەها دهۆكێ: پۆستێن سەرەكیێن پارێزگەها ئەم بدەستێ‌ چ لایەنەكێ‌ دیتر یێ سیاسێ ڤە بەر‌ نادەین

دهۆك -KDP.info- سەرۆكێ‌ جڤاتا پارێزگەها دهۆكێ‌ (فەهیم عەبدوڵڵا حەمۆ) دبێژیت، دهۆك نەوەكو پارێزگەهێن دی یە، مافێ‌ وان لایەنێن سیاسی یە ێن بەیانامە بەلاڤكری و بخوە پوستان دخواز بكەن ‌لێ مە چ رێكەڤتن دگەل دا نینە، خەلكێ‌ پارێزگەها دهوكێ ژی ‌چاڤ لێ یە دهۆكێ‌ جڤاتەكا ئەكتیڤ هەبیت و خزمەتا وەلاتیان بكەتن.

پشتی ل مەها بۆری ب پشكدارییا هەموو لایەنێن سیاسیێن دهوكێ حكومەتا خوەجهییا پارێزگەها دهۆكێ‌  هاتیە پێكئینان و پارێزگارێ‌ دهۆكێ‌ و سەرۆكێ‌ جڤاتێ و جێگری جڤاتێ ‌ هاتینە دەسنیشان كرن، لایەنێن سیاسێ ێن دهوكێ كو هەر یەك ژ یەكگرتوویا ئیسلامی و یەكێتییا نیشتیمانی و تەڤگەرا گۆڕان و بزاڤا ئاشووری ، ل مەلبەندێ‌ سێ‌ یەكگرتوو ل سەر پێكئینانا چڤاتا پارێزگەها دهۆكێ‌ و دابەشكرنا پۆستان كۆم بوون و بەیانا‌مەكا هەڤپشك بەلاڤ كرن و د بەیانامێ دا هەر چار ئالییان داخوازا پێكئینانا حكومەتەكا خوەجهی یا فڕەلایەن ب پشكدارییا تەڤ ئالییان بهێتە راگەهاندن هەر وەك، چەوا ل هەولێر و سلێمانیێ بزاڤێن پێكئینانا حكومەتەكا ب ڤی رەنگی دهێنە كرن.

لدور ڤێ یەكێ ژی سەرۆكێ‌ جڤاتا پارێزگەها دهۆكێ‌ (فەهیم عەبدوڵڵا حەمۆ) كو لسەر لیستا  پارتی دیموكراتی كوردستانێ‌یە بۆ kdp.infoدبێژیت: دهۆك نەوەكو پارێزگەهێن دی یە، مافێ‌ وان لایەنێن سیاسی یە ێن بەیانامە بەلاڤكری و بخوە پوستان دخواز بكەن ‌لێ مە چ رێكەڤتن دگەل دا نینە، خەلكێ‌ پارێزگەها دهوكێ ژی ‌چاڤ لێ یە دهۆكێ‌ جڤاتەكا ئەكتیڤ هەبیت و خزمەتا وەلاتیان بكەتن، بۆچی وان بەس چاڤ ل پۆستان هەیە بۆچی ناهێن جڤاتەكا ئەكتیڤ چێكەین خزمەتا خەلكی هەموویێ‌ بكەت.

ناڤبری ئاشكەرا ژی كر، هەر دەمێ سەركردایەتیا پارتی وەكو حكومەتا هەریمێ رێكەڤتن دگەل وان لایەنان كر، وی دەمی دێ‌ پابەند بین و ئامادە بین كو  دانوستاندنێ‌ ل سەر وان پۆستان بكەین لێ هەتا نها سەركردایەتیا پارتی چ رێكەڤتن دگەل ئەڤان لایەنێن سیاسێ نینە و پارتی شیایە لدهوكێ 2/3 كورسیكێن جڤاتێ بدەست خوڤە بینینت لەوما ئەم دماڤێ خوە دزانین كو پوستان لسەر خوە دابەش كەین.

سەرۆكێ‌ جڤاتا پارێزگەها دهۆكێ‌ زێدەتر گۆت ژی، پۆستێن سەرەكیێن پارێزگەها دهوكێ ئەم بدەستێ‌ چ لایەنەكێ‌ دیتر یێ سیاسێ ڤە بەر‌ نادەین، ئەڤە نە ئەوە ئەم تەعدایێ‌ دكەین ئەڤە بنەمایێن دیمكراسیێ‌ نە و ئەز داخوازێ ل وان هەڤالان دكەم كو بهێن و پێكڤە جڤاتەكا سەركەفتی چێكەین و خزمەتا وەلاتیێن دهوكێ بكەین.

دڵدار ئیبراهیم