سەركردەكانی پەكەكە هەندێکیان دەچنە ئەورووپا و بەشێكیش لە كوردستان دەمێننەوە.. (ئۆجەلان و ئەردۆغان) ڕێککەوتوون
دیاربەكر- KDP.info- لە چوارچێوەی هەوڵەكانی حكوومەتی توركیا و سەرۆكی زیندانیکراوی پەكەكە (عەبدوڵلا ئوجەلان)-دا بۆ چارەكردنی پرسی كورد، زانرا كە (رەجەب تەیب ئەردۆغان و عەبدوڵلا ئۆجەلان) لەسەر چۆنیێتیی دانانی چەك لە لایەن پەكەكەوە و دابەزاندنی پەكەكە لە چیا رێككەوتوونە.
ماڵپەڕی 'ئاڤێستا کورد" هەروەها بڵاوی کردووەتەوە، بەپێی ئەو رێككەوتنەی نێوان (ئۆجەلان و ئەردۆغان) لە ماوەی دوو ساڵدا پەكەكە چیاكان چۆڵ دەكات و بە یەكجاری واز لە چەك و شەڕی چەكداری دەهێنێت و كاروباری سیاسی لە لایەن بەدەپە و هەدەپەوە بەڕێوە دەبرێت و بەشێك لە ئەندامانی پەكەكەیش دەتوانن لە نێو بەدەپە و هەدەپەدا درێژە بە كاروباری سیاسی بدەن.
بەڵام جێگری سەرۆكوەزیرانی توركیا (بەشیر ئاتالای) رایگەیاند كە ئەو دەنگۆیانە دوورن لە راستی و سەرۆكوەزیرانی توركیا و (عەبدوڵلا ئۆجەلان) هێشتا كۆ نەبوونەتەوە و بڕیاریش نییە كۆ ببنەوە.
ئاتالای گوتیشی لەسەر ناوی حكوومەتی توركیا بەرپرسی دەزگای هەواڵگیریی توركیا (هاكان فیدان) و چەند بەرپرسێكی دیكەی ئەو دەزگایە لە كاتی پێویستدا لەگەڵ (ئۆجەلان)-دا كۆبوونەوەیان ئەنجام داوە و بەردەوام دەبن لە ئەنجامدانی كۆبوونەوەكانیش.
وەک زانراوە لە بەشێكی دیكەی ئەو رێككەوتنەدا کە باسی لێوە دەکرێت، چۆنیێتیی دابەزاندنی سەركردەكانی پەكەكەیش خراوەتە بار باس و هەردوولا لە سەر ئەوە رێككەوتوونە كە بەشێك لە سەركردەكانی پەكەكە دەتوانن بچنە ئەورووپا و لەوێ بمێننەوە و بەشێكی دیكەیشیان لە باشووری كوردستان نیشتەجێ بن و هەر جۆرە هاوكارییەكی پێویستیش پێشكەشیان دەكرێت.
هیوا ئەردەلان
