کامیل ساڵەیی: نازانین بەغدا مووچەی فەرمانبەرانی کەرکووک دەدات یان نا
هەولێر-KDP.info- قایمقامی كەركووك دەڵێت، بودجەی ساڵی 2014ـی كەركووك زیاتر لە ترلیۆنێك و 266 ملیارە. ڕوونیشی دەكاتەوە كە سەبارەت بە وەستانی بودجە یان نەدانی مووچەی فەرمانبەران، هیچیان لە بەغداوە بەدەست نەگەیشتووە.
قایمقامی كەركووك كامیل ساڵەیی، بۆ KDP.infoگوتی: "لە دوای 28ـی مانگەوە لە شاری كەركووك مووچە دابەش دەكرێت، هیچ شتێكیشمان لەلایەن حكوومەتی ناوەندییەوە سەبارەت بە وەستانی بودجە یان كەمكردنەوەی یاخود نەدانی مووچەی فەرمانبەرانی پارێزگای كەركووك، بەدەست نەگەیشتووە".
ساڵەیی گوتیشی: "تائێستا بودجە بە تەواوی رەزامەندی لەسەر نەدراوە، ئەگەرچی وەكو ژمارە لەلای ئێمە هەیە كە بودجەی ساڵی 2014ـی كەركووك زیاتر لە ترلیۆنێك و 266 ملیارە، بەڵام تا ئێستا رەزامەندی لەسەر بودجەی هەموو عێراق نەدراوە، بۆیە تائێستا هیچ گۆرانكارییەك بەسەر بوجەدا نەهاتووە، وەلێ زۆرێك لە پڕۆژەكان وەستاون و چاوەرێی پەسندكردنی بودجە دەكەین تەنانەت زۆر لە خەرجییەكانی تریش وەستێنراون و هیچ جموجۆڵێك لەو بارەیەوە نییە، ئەوەیش وابەستەی ئەم بارودۆخەی ئێستایە."
قایمقامی كەركووك هەروەها ئاماژەی دا: "هیچ هەنگاوێك بۆ ساڵی تازە نەنراوە لەسەر بنەمای هەبوونی بودجەی 2014 ئەوەیش لەسەر یەكلاكردنەوەی بودجە وەستاوە لەلایەن حكوومەتی عێراقییەوە و بەو هۆیەیشەوە هەموو كارەكان وەستاون.
پەیوەست بە یەكدەنگی و داواكاریی ئێستای شاری كەركووك، ساڵەیی گوتی: "لەسەر ئەنجوومەنی پارێزگا و پارێزگا و هەموو یەكە ئیدارییەكانی كەركووك پێویستە بە تێكڕا دەنگیان بكەن بەیەك و داوا بكەن پێداچوونەوە بە جۆری پەیوەندیمان لەگەڵ دەسەڵاتی ناوەنددا بكرێت، لەبەر دووو خاڵی سەرەكی، یەكەمیان ئەوەیە كە دەسەڵاتی ناوەند نەیتوانی بەرگری لە شاری كەركووك بكات و دووەمیش ئێمە لە ماوەی ساڵانی رابردوودا كۆمەڵێك كێشەمان لەلایەن دەسەڵاتی ناوەندەوە بۆ دروست بووە".
