ئەمڕۆ سیڤیی وەزیرەكان و كارنامەی حكوومەت دەگاتە پەرلەمان

هەولێر- تایبەت بە KDP.INFO- سكرتێری پەرلەمانی  كوردستان ڕایگەیاند، بڕیارە ئەمڕۆ سیڤیی وەزیرەكان و كارنامەی حكوومەت بگاتە پەرلەمانی كوردستان.

 سكرتێری پەرلەمانی  كوردستان فەخرەدین قادر، بە KDP.INFOـی راگەیاند: بڕیار بوو رۆژی پێنجشەممەی رابردوو سیڤیی وەزیرەكان و كارنامەی حكوومەت  بگاتە پەرلەمان، بەڵام تاوەكو ئێستا نەگەیشتووە و بڕیارە ئەمڕۆ بگاتە دەستیان.

فەخرەدین قادر گوتیشی: رەنگە هۆكاری دواكەوتنەكەیش بۆ ئەوە بگەڕێتەوە تاوەكو ئێستا پێكهاتەی وەزیرەكان تەواو نەبووبێت.

ئەوەیشی خستەڕوو، ئەمڕۆ دواوادەیە بۆ پێشكەشكردنی سیڤیی وەزیرەكان و كارنامەی حكوومەت، چونكە پێویستە 48 سەعات پێش متمانەدان بە حكوومەت سیڤیی وەزیرەكان و كارنامەی حكوومەت بگاتە پەرلەمان، ئەگەر ئەمڕۆ نەگات پێویستە سەرلەنوێ رێكاری یاسایی بگرینە بەر و ئەم جارە تەنیا سەرۆكی حكوومەت راسپێرین.

بەپێی زانیارییەكانیش، ئەمڕۆ سیڤیی وەزیرەكان و كارنامەی حكوومەت دەگاتە دەست پەرلەمان و رۆژی چوارشەممەیش پەرلەمان كۆ دەبێتەوە و تێیدا متمانە بە كابینەی هەشتەمی حكوومەتی هەرێمی كوردستان دەدات.

بڵند ئیبراهیم