زاخۆ.. 15 ده‌ڤه‌رێن گه‌شتیارى ژبه‌ر په‌كه‌كێ هاتینه چۆلكرن
زاخۆ-KDP.info- فروكێن توركیا ب به‌هانه‌یا هه‌بوونا چه‌كدارێن په‌كه‌كێ به‌رده‌وام گوندێن دكه‌ڤنه د سنوورێ قه‌زا زاخو دا توپباران دكه‌ن و زیانه‌كا مه‌زن ژى به‌ر ب ئاقارێ خه‌لكێ دگه‌هینن، رێڤه‌به‌رێ گه‌شتوگوزارا زاخو ژى دیار دكه‌ت، په‌كه‌كێ زیان گه‌هاندییه رێژا گه‌شتیار و داهاتێ گه‌شتیاریێ ل ئه‌ڤێ ده‌ڤه‌رێ.
چیا ئه‌مین، رێڤه‌به‌رێ رێڤه‌به‌ریا گه‌شتوگوزارا زاخو بۆ ماڵپه‌رێ فه‌رمیێ پارتى دیموكراتى كوردستان راگه‌هاند: ژسه‌رجه‌مێ 30 گوند و ده‌ڤه‌رێن گه‌شتیارى و هاڤینگه‌هێن سه‌ر ب قه‌زا زاخو ڤه، 15 ژوانا بئێكجارى ژبه‌ر په‌كه‌كێ هاتینه چۆلكرن و گه‌شتیار ژى نه‌شێن قه‌ستا وان ده‌ڤه‌ران بكه‌ن و ئه‌ڤێ چه‌ندێ ژى كارتێكرن ل رێژا داهاتێ گه‌شتیاریێ كرییه.
ناڤهاتى دا دیاركرن: نوكه په‌كه‌كه ل هاڤینگه‌هان كوژمه‌كى پاره‌یى ژ وه‌لاتى و گه‌شتیاران وه‌ردگرن كو ب رێژا پتر ژ 20% داهاتێ گه‌شتیارى یه، ئه‌ڤ یه‌ك ژى بوویه ئه‌گه‌ر ئێدى ئه‌و جهـ ژ ترس و نه‌خوه‌شیا هێزێن وان بهێنه چوولكرن.
ئه‌میر نیسان، وه‌لاتیه‌كێ خه‌لكێ شه‌رانشێ یه و چه‌ند جاران ژبه‌ر توپێن فروكێن توركیا ره‌ڤییه، بۆ ماڵپه‌رێ فه‌رمیێ پارتى دیموكراتى كوردستان دیاركر: رۆژانه فرۆكێن شه‌ركه‌رێن توركیا ده‌ڤه‌رێن مه ب تایبه‌ت ژى گوندێن (كوخێ ره‌ش، خانكێ، شه‌رانش، قه‌سروك و خامتیرى) توپباران دكه‌ن و دئه‌ڤ ساله‌دا 22 جاران ئه‌و ده‌ڤه‌ر كه‌فتینه به‌ر توپان، گه‌هشتییه وى راده‌یى مه گوندێ خوه یێ شه‌رانشێ چوولكرییه و ئێدى خه‌لك نه‌شێن ل وێ ده‌ڤه‌رێ بژین، هه‌روه‌سا ژبه‌ر هه‌بوونا په‌كه‌كێ فروكێن توركیا ل رۆژا شه‌مبیا بوورى سێ به‌هرێن گوندێ خانكێ سووتن و زیانه‌كا مه‌زن ب ئاقارى گوندییان ئێخستن.
گوندێ شه‌رانشێ نزیكى 25 كێلومه‌تران ژ سه‌نته‌رێ قه‌زا زاخو دویره و چه‌ندین هاڤینگه‌هان بخوه‌ڤه دگرت، پێشتر نزیكى 40 مالێن موسلمان و مه‌سیحییان لێ دژیان، به‌لێ پشتى په‌كه‌كێ خوه ل وان ده‌ڤه‌ران ئاسێ كرى و توركیا ئه‌و گوند توپبارانكرین، نوكه چ كه‌سه‌ك ل وى گوندى ژیانێ نابته سه‌ر.
محه‌ممه‌د سدیق
