حازم میر ته‌حسین به‌گ بوو به میری ئێزدییه‌كان
هەولێر-KDP.info- ئەمڕۆ شه‌ممه 27/7/2019، لە پەرستگای لالش له قه‌زای شێخان له رێوڕەسمێکدا حازم میر ته‌حسین به‌گ، وه‌ك میری نوێی ئێزدییه‌كان و سه‌رۆكی ئه‌نجوومه‌نی رۆحانی ئێزدییه‌كان ده‌ستنیشان كرا و سوێندی ئایینی خوارد.
میری نوێی ئێزدییه‌كان له وتارێكدا رایگه‌یاند: "له‌گه‌ڵ پیاوانی ئایینی و رۆشنبیرانی ئێزدیی توانیمان بگه‌ینه ئه‌و رۆژه، له ئه‌مڕۆوه وه‌ك میر له خزمه‌تی ئێزدییه‌كاندا ده‌بم و ئه‌نجوومه‌نێك داده‌مه‌زرێنین و زیاتر له 60% شنگالییه‌كان ده‌بن".
هه‌روه‌ها گووتی په‌یوه‌ندییه‌كانمان له‌گه‌ڵ پێكهاته‌كانی دیكه باشتر ده‌كه‌ین و له‌گه‌ڵ حكوومه‌تی هه‌رێمی كوردستان كار بۆ ئاوه‌دانكردنه‌وه و خزمه‌تی زیاتری ناوچه‌كانی ئێزدخان ده‌كه‌ین".
هه‌روه‌ها سوپاسی سه‌رۆك بارزانی و نێچیرڤان بارزانی و مه‌سروور بارزانی و هه‌موو ئه‌و كه‌سانه‌ی كرد كه رۆڵیان هه‌بوو له چاره‌سه‌ركردنی كێشه‌ی میرایه‌تی ئێزدییه‌كان و سوپاسی ته‌واوی خه‌ڵكی كوردستانی كرد و داوای له خوای گه‌وره كرد ئیزدییه‌كان بپارێزێت.
حازم تەحسین بەگ، کوڕی میر تەحسین بەگە و لە ساڵی 1963 لە باعەدرێ لەدایکبووە و لە ساڵی 1989 وە وەکیلی میر تەحسین بەگی باوکی بووە.
رۆژی ٢٨ی کانوونی دووەمی ئەمساڵ میر تەحسین بەگ، میری ئێزدییانی جیهان لە ئەڵمانیا بەهۆی نەخۆشییەوە کۆچی دوایی کرد.
27/7/2019
