د.جەعفەر ئێمینکى: پرۆژەیێن گۆمان لێکرى ئێکرێزیێ پەیدا ناکەت

دهۆک-KDP.info- (د.جەعفەر ئێمینکى)، جێگرێ سەرۆکێ پەرلەمانێ کوردستانێ و ئەندامێ مەکتەبا سیاسییا پارتى دیموکراتى کوردستان راگەهاند، پەرلەمان و حکومەتا هەرێما کوردستانێ دەست بکارێ هەماهەنگى و هەڤکاریى کریە، کۆ جارەکا دیتر دەستێ خۆ بۆ جاکسازیێ ببەن، نوکە ژى یاسا لێبورینا گشتى یادئێتە بەرهەفکرن بۆ زیندانیان، جونکى هەر جڤاکەکێ بهێز بیت دێ شێت لێبورینێ کەت، ژبەر هندێ دگەل سزادانێ دڤێت لێبورین ژى هەبیت.

(د.جەعفەر ئێمینکى)، جێگرێ سەرۆکێ پەرلەمانێ کوردستانێ و ئەندامێ مەکتەبا سیاسییا پارتى دیموکراتى کوردستان بۆ مالپەرێ فەرمیێ پارتى دیموکراتى کوردستان گۆت:" پەرلەمانێ کوردستانێ ب شێوەیەکێ ئاسایى کومبوونێن خۆ ئەنجامددەت و دەست بکار بوویە، پەرلەمان و حکومەتا هەرێما کوردستانێ دەست بکارێ هەماهەنگى و هەڤکاریى کریە، کۆ جارەکا دیتر دەستێ خۆ بۆ جاکسازیێ ببەن، ئەڤە ژى پرۆژەکێ شارستانیێ مەزنە، جونکى هەر جڤاکەکا بڤێت شەرى دژى گەندلیێ بکەت، دێ جاکسازییان دناڤ دام و دەزگەهێن حکومى و حزبى کەت".

پەرلەمان وەک دەستهەلاتا تەشریعى، چ پرۆژە و برگەیێن یاسادانانێ هەنە؟

جێگرێ سەرۆکێ پەرلەمانێ کوردستانێ بەحسکر، چەندین برگەیێن یاسادانانێ هاتینە پێشکێشکرن، وەک (گرێكرنا خانوبەرا و یاسا دژە تیرۆر)، جونکى دخوازین یاسایەک سەربەخۆ دبوارێ دژە تیرۆرێدا هەبیت، مە داخواز ژ هەمى لێژنێن پەرلەمانى کریە پرۆژە یاسایێن خۆ بینە روونشتنێن پەرلەمانى، دا وان ژى ئێکلا بکەین، نوکە ژى یاسا لێبورینا گشتى یادئێتە بەرهەفکرن بۆ زیندانیان، جونکى هەر جڤاکەکێ بهێز بیت دێ شێت لێبورینێ کەت، ژبەر هندێ دگەل سزادانێ دڤێت لێبورین ژى هەبیت.

(د.جەعفەر ئێمینکى) خویاکر:" تاکە کارتا فشارا مە لسەر حکومەتا عیراقێ ئێکرێزیا جڤاکى و سیاسییا خەلکێ کوردستانێ یە، مللەت ئێکە بەلێ دڤێت هەڤگرتن دناڤ هێزێن سیاسیدا دچارچوڤەیێ نیشتمانیدا دروست ببیت، ئینانا پرۆژەیێن گۆمان لێکرى ژلایێ  هندەک سەرکردە و لایەنێن سیاسیێن كوردڤە ب هیچ رەنگەکى ئێکرێزیێ پەیدا ناکەت، ژبەر هندێ بەغدا هەر دەم هێزا دووبەرکیا مە بۆ پەرژەوەندیا خۆ بکار دئینیت".

هەلز عەلى سەلیم