پۆلیسی هەولێر چەندان كەسی بە تۆمەتی هەڵگرتنی چەك دەستگیر كردوون
هەولێر-KDP.info- بەڕێوەبەری پۆلیسی هەولێر ڕایدەگەیەنێت، ئەمشەو لە هەولێر و دەوروبەری چەندان كەسیان بە تۆمەتی هەڵگرتنی چەك بە شێوەی نایاسایی و چەقۆ و دامبۆكس، قۆڵبەست كردوون.
لیوا (عەبدولخالق تەڵعەت) بەڕێوەبەری پۆلیسی هەولێر ڕایگەیاند، ئەمشەو دەستیان بە هەڵمەتێكی پشكنین لە كافتریا و شوێنە گشتییەكان دەست پێكردووە و كۆمەڵێك كەسیان بە تۆمەتی هەڵگرتنی چەك بەبێ مۆڵەت و بە شێوەی نایاسایی، دەستگیر كردوون.
وەك بەڕێوەبەری پۆلیسی هەولێر هێمای بۆ كرد، تیمی گەڕۆكیان هەیە و جگە لەوەی لە شوێنە گشتییەكان و كافتریا و قاوەخانەكاندا دەستیان بە پشكنینی ورد كردووە، بەوپەڕی وریایی و چاوكراوەییەوە، تیمەكانیان بازگەی كاتی دادەنێن و هەموو ئەوانە دەستگیر دەكەن كە سەرپێچیی یاسا دەكەن.
لیوا (تەڵعەت) ئەوەشی خستە ڕوو، لەو هەڵمەتەدا هێزەكانی ئاسایشی گشتی، ئاسایشی هەولێر، پۆلیسی چالاكییە مەدەنییەكان، پۆلیسی فریاكەوتن، پۆلیسی نەهێشتنی تاوان و پۆلیسی ناوشار بەشدارن و هەڵمەتەكەش بەردەوام دەبێت.
ئومێد بابان
