پرۆژەیێ بودجا عیراقێ تومامکەرێ هێرشا لەشکەرییە بۆ هەرێمێ

 

دهۆک-KDP.info-  مامۆستایه‌كێ زانینگەهێ و هەلگرێ باوەرنامەیا ماستەرێ ب ئابۆر و پترولێ راگەهاند، پرۆژەیێ بودجا عیراقێ بۆ سالا 2018ێ، تومامکەرا هێرشا لەشکەرى یە بۆ هەرێمێ برێکا ئابۆرى، پەیاما حکومەتا عیراقێ بۆ کوردستانێ یا سیاسى و ئابورى یە، جونکى پتر ژ 16 ترلیون دیناران بۆ وەزارەتا نەفتا عیراقێ تەرخانکریە و بەرامبەر هندێ هیچ پارەیەک بۆ وەزارەتا سامان و سروشتیێن هەرێمێ تەرخان نەکریە.

(کاوە عەبدولعەزیز)، مامۆستایێ زانینگەهێ و هەلگرێ باوەرنامەیا ماستەرێ ب ئابۆر و پترولێ، بۆ مالپەرێ فەرمیێ پارتى دیموکراتى کوردستان گۆت:" پرۆژەیێ بودجا عیراقێ بۆ سالا 2018ێ، تومامکەرا هێرشا لەشکەرى یە بۆ هەرێمێ برێکا ئابۆرى، واتە حکومەتا عیراقێ یا ب هەمى شێوەیان هێرشێن درندانە دئێخیتە سەر هەرێما کوردستانێ".

هەمى رەفتارێن حکومەتا عیراقێ دژى دستورێ نە، (کاوە عەبدولعەزیز) زەلالکر: "بەهرا هەرێما کوردستانێ ژ بودجێ 17% یە لگۆر دستورى، نوکە حکومەتا عیراقێ 12،67% تەرخانکریە، حکومەتا عیراقێ مەرجێن گەلەک توند یێن ئێخستینە سەر هەرێمێ، کۆ ناڤێ هەرێما کوردستانێ ب پارێزگەهێن هەرێمێ ئینایە و نەجار کریە هەیڤانە 250 هزار بەرمیلێن پترولێ رۆژانە برێکا کومپانیا بازارکرن و ڤروتنا عیراقێ (سومو)یى رەوانەیى دەرڤەیى بکەن و هیچ مستەحەقاتەک بۆ وان کومپانیا یێن پترولێ دئینە دەر تەرخان نەکرینە، ئەگەر بۆ دەمەکى چ پارە نەهاتنە رەوانەکر بۆ ژمیریارێن ڤان کومپانیان ئێدى دێ دەست ژکارى بەردەن، جونکى ئەڤ کومپانیە نەیێن خیرخوازیى نە، بەلێ کار بۆ مفا وەرگرتنێ دکەن".

پەیاما حکومەتا عیراقێ بۆ کوردستانێ یا سیاسى و ئابۆرى یە، چونکى پتر ژ 16 ترلیون دیناران بۆ وەزارەتا نەفتا عیراقێ تەرخانکریە و بەرامبەر هندێ هیچ پارەیەک بۆ وەزارەتا سامان و سروشتیێن هەرێمێ تەرخان نەکریە.

مامۆستایێ زانینگەهێ بەحسکر، حکومەتا عیراقێ نامەکێ ددەتە کومپانیێن وەربەهینان و لێگەریانا نەفتێ ل هەرێما کوردستانێ  دەست ژکارى بەرددەن و هەرێمێ بجه بهێلن و رەوانەیى عیراقێ ببن، دیسان حکومەتا عیراقێ دڤێت بارگرانیەکا مەزن بدانیتە سەر هەرێمى داکۆ مەرجێن خۆ لسەر حکومەتا هەرێمێ ب سەپینیت، ئەڤە هەمى پشتى کۆ بودجا هەرێمێ دشەرێ دژى تیرۆرێدا نەداین و هەمى مستەحەقاتێن دیتر یێن خەلکێ کوردستانێ قوتکرین، ژبەر هندێ نابیت حکومەتا هەرێما کوردستانێ ب هیچ رەنگەکى رازى بیت تا پارەیێن کومپانیان نەئینە رەوانەکرن، جونکى ئەگەر هەرێم رازى بوو دێ بیتە خوکوشتنەکا ئابورى.

هەلگرێ باوەرنامەیا ماستەرێ ب ئابۆر و پترولێ ئاماژەدا، فەرە لسەر حکومەتا هەرێما کوردستانێ ژبلى رێکخستنا ناڤمالى و ئێک گوتاریا کوردستانێ، دانو ستاندنان دگەل ڤان کومپانیان ئەنجامبدەت و رەوشا نوکە بۆ شرۆڤە بکەت، دیسان برێکا ئێکەتیا ئورۆپى و ئەمریکا کڤاشتنان لسەر عیراقێ زێدە بکەن ژبۆ نەهێلانا ڤێ دژایەتیى، ئەڤ یاسایە ژلایێ پەرلەمانیڤە نەهاتیە پەسەندکرن، واتە دەم بۆ گهورینا وێ هەیە.

هەلز عەلى سەلیم